CEBU, Philippines - Nigawas nga hari sa men’s division si Reiz Enriquez human niya gidominaran ang 4th edition sa Cebu Doctors University Run kagahapon didto sa CDU-Mandaue City Campus.
Si Enriquez kinsa napakyas pagsalmut sa lumba niadtong miaging tuig mao usab ang nakadawat sa Sun Cellulars Unlimited King tungod sa gipakita niyang kapaspas ug lahutay sa 10K run.
Ang 24-anyos nga si Enriquez nga bag-o pa lang nibalik dinhi sa Sugbu human sa iyang training sa Manila , nitapos sa lumba sa oras nga 31:22.76.
Nagsunod kaniya ang garbo sa University of Southern Philippines Foundation (USPF) nga si Eugene Delposo sa oras nga 31:42.72 sa second place, samtang si Adonis Singson mipahiluna sa third place sa oras nga 31:53.71.
Sa iyang bahin, gipalagpot usab ni Mary Grace Delos Santos ang defending champion sa miaging tuig nga si Madelyn Carter sa iyang trono isip reyna sa 10 women’s division.
Ang Zamboanga native nga si Delos Santos kinsa nangharus karon sa tanang lumba dinhi sa Sugbu sulod na sa duha ka tuig, nitapos sa lumba sa oras nga 35:05, samtang si Carter nagsunod kaniya sa oras nga 42:50.56.
Giguba usab ni Donna Cruz-Larrazabal ang kaugalingon niyang record dihang nirehistro siya og oras nga 48:48.56 layo ra sa iyang target time nga 53 minutos alang sa third place.
Sa iyang bahin, si Dr. Yong Larrazabal, kinsa mao ang tigpasiugda sa maong lumba mao ang nanghawud sa 10K doctor’s class sa iyang oras nga 41:42.19. Sila si Dr. Harem Deiparine (43:07.44) ug Dr.Raymund Bontol (44:21.84) nitungtong usab sa ikaduha ug ikatulong dapit.
Sa women’s division sa 10K doctor class, si Dr. Emily Estrada (54:51.10) maoy nikampiyon uban nila ni Dr. Rosan Trani (56:31.68) ug Dr. Nicole Chua (1:01:21.94) sa second ug third place. - Lemuel P. Maglinte (BANAT NEWS)