1st Cebu Coastal Adventure Challenge

CEBU, Philippines - Nahikay na ang alang sa pagpahigayon sa 1st Cebu Coastal Adventure Challenge nga mosikad karong Septiyembre 19 nga manukad sa Mactan ug matapos sa Parkmall.

Atol sa press conference kagahapon diha sa Handuraw Resto Bar, gibutyag sa organizers nga may 31 na ka teams ang nikonpirmar sa ilang partisipasyon sa maong kalihukan.

Gawas sa Sugbu, mosalmot sab ang mga silingang probinsiya sama sa Bukidnon, Negros, Manila ug Davao.

Si race director Allan Salazar nagkanayon nga ang matag koponan langkuban og tulo ka magduduwa nga motaak sa 65-kilometro nga lumba nga libot sa Mactan, Cebu, Cordova ug Lapu-Lapu.

Matud pa ni Salazar nga ang karera nga naglakip sa hiking, biking, kayaking, orienting ug uban pa nga mga mystery challenges gilauman nga mahuman sud sa unom ngadto sa walo ka oras   depende sa gikusgon ug sa route selection.

Sa iyang bahin, si race organizer Fillip Castro mibutyag nga ang maong coastal race bukas sa tanang interesadong mosalmot ug dili lang ngadto sa professional adventure racers.

Dugang ni Castro nga ang tumong sa lumba mao nga matudloan ang mga partisipante sa hustong pag-atiman sa kabaybayonan ug walay magpasad sa basura.

Gawas sa tropeyo, ang   kampiyon mobulsa og P15,000, ang second placer makaangkon og P10,000 , samtang ang third placer makadawat og P5,000.

Ang registration fee nagkantidad og P1,500 alang sa three-man team ug P5,000 alang ngadto sa mga corporate sponsored team. Ang deadline hangtod lamang sa Septiyembre 18.

Alang sa dugang mga impormasyon, mahimong motawag sa numero 0909-321-7756 o bisita sa www.Coastalrace.com. Ang maong lumba gipasiugdahan sa Coastal Conservation and Education Foundation Inc (CCEF). – BANAT NEWS