MMA, k'boxing showdown sa Carmen

CEBU, Philippines - Kulbahinam nga aksiyon ang masaksihan sa lumulupyo sa Carmen dihang dad-on sa nahisgutang lungsod ang kulbahinam nga Mixed Martial Arts (MMA) ug kickboxing showdown ugma diha sa Carmen Sports Complex.

Mga opisyales sa organizing Extreme Combat Sports Mixed Martial Arts, mibutyag nga mao kini ang labing unang higayon dinhi sa Sugbu nga sila mogamit og Octagon Cage nga himuong fighting ground.

Sa main event sa MMA action, si Neil Dungog sa Komuyokai makigpinaksitay ni Joven Gonzaga sa Gaf-Mixed.

Ang laing sangka sa MMA action naglakip ni Ramuez Colina sa Island Grappler batok ni Jason Tan sa C-Mac Bullet, Eduard Mantesa sa Komuyokai batok Jover Gonzaga sa Gaf-Mixed, Pablo Santillan sa Durex Dragon batok Eluterio Tapdasan sa Gaf-Mixed ug Junrex Soquite sa Durex Dragon batok Aniceto Gesta Jr. sa C-Mac.

Sa kickboxing showdown, si Demetrio de la Torre sa C-Mac Main makigpinaksitay batok ni Johnjer Torbiso sa Durex Dragon, samtang si Kenan Villaflor sa Muay Thai Cebu makighamag ni Armin Guardiano sa C-Mac Bullet.

Ang maong kalihukan gipaluyohan ni Carmen Mayor Sonia Q. Pua ug events coordinator Bambi Pua.

Sa laing bahin, ang labing unang Mayor Sonia Pua Cup and PNP Gun Proficiency himuon karong weekend diha sa St. Augustine Firing Range.

Himuon kini gikan sa alas-8 sa buntag hangtod sa alas-5 sa hapon.

Si Regional Fisheries and Training Center director ug St. Augustine Gun Club president Eduardo A. Suderio ug Carmen police chief Insp. Carlos Reyes gipaabot nga motambong sa maong kalihukan.

Ang awarding ceremonies himuon karong Domingo diha sa Carmen Activity Center diin si Mayor Sonia Pua mao mismo ang mohatag sa mga ganti ug medalya ngadto sa top performers. – BANAT NEWS