Jhon Videoke misakmit titulo sa LLBA Friendship Cup 2009

CEBU, Philippines - Nahimong mangluluwas si Ruben Dignos sa tropa sa Jhon Videoke human mapasulod ang iyang 3-pointer sa nahabiling 27 segundos sa final period batok sa mortal nilang kaatbang Yan C Rico, 61-58 aron paglangkat sa korona sa 1st Villas Magallanes League nga ginganlan og "LLBA Friendship Cup 2009" didto sa Villas Magallanes gym sa Sta. Lucia Properties sa Basak, dakbayan sa Lapu-Lapu.

Ang Jhon Videoke ni team manager Lito Magat, naggukod gikan sa pagsugod ug gani gibinlan pa kini og sayes puntos nga biya paghuman sa unang kuwarter, 16-22.

Sakit kaayo ang naangkong kapildihan sa Yan C Rico ni team manager Tiger Inot kay sila man ang nikontrolar sa duwa gikan sa pagsugod hangtod nga si Dignos mibuhi sa iyang marka-bahala nga 3-point shot gikan sa assist ni Oca Fuentes sa himalatyong oras nga maoy nakapalabaw sa Jhon Videoke sa labing unang higayon.

Ang Yan C Rico may purohan unta nga mosakmit sa daog dihang ila ang ball possession, apan si Pompi Ngujo abtik kaayong miilog sa bola nga nakapahugyaw sa kampo sa Jhon Videoke.

Wala magsilbe ang mga paningkamot ni playing coach King Celiz ug nahanaw ang iyang damgo nga hatagan og korona ang iyang koponang Yan C Rico tungod kay nahubsan sa kainit ang iyang mga batos sa nanghinapos na nga bahin sa duwa. Wala sab makaugpo si Sammy Lapoja, kinsa iyang gitahasan pagbantay sa higante sa Jhon Videoke nga si Magat.

Si Magat, kinsa mi-iskor og 13 puntos maoy napiling MVP tungod sa mabayanihon niyang duwa, apan si Ngujo maoy topscorer sa kadaugan nga miposa og 14 puntos.

Nangulo sab si Magat sa Mythical Five uban sa iyang teammate nga si Ngujo, Jun Medina ug Alan Sepe sa Yan C Rico ug Temor Portugaliza sa Daniela's Internet Café-Purcia.

Ang walay suwerting Yan C Rico ni team owner Atty. Rico Amores gipangulohan ni LLBA president Alan Sepe, Ondo Cadungog ug Joel Ochea nga mikimada og 12 puntos matag usa.

Sa pasiunang duwa, ang Mialnea Stones nagsalig sa ilang kainit sa second half pagpukan sa Smart Titans, 62-52 aron sa pagpahiluna sa ikatulong dapit.

Si LLBA commissioner Alan Yu maoy nangulo sa kadaugan pinaagi sa iyang 16 puntos, gisundan nilang Alvin Bentazal ug Bulldog Ybañez nga parehong miamot og otso puntos.

Ang pilderong Smart Titans gipangulohan sab ni Armand Lamoste, kinsa mibahog og 13 puntos.

Gidumala ni Billy Nadado, ang liga gipaluyohan sab ni Lapu-Lapu Mayor Arturo Radaza ug sa iyang asawa nga si Hon. Brgy. Capt. Paz Radaza, OCS Overseas Courier Service Inc.-Cebu, Psalmstre Ent. Inc. Martinito Villamor, Atty. Rico Amores ug ni Dandan Ramos sa i3R Motor Parts.

Puntos Matag Usa

Unang duwa:

MIALNEA STONE (62) - Yu 16, Bentazal 8, Ybañez 8, Patalinghug 7, Soroño 7, Tempurada 6, Daluz 6, Francisco 2, Igot 2

SMART TITANS (52) - Lamoste 13, Gutib 12, Impash 10, Ramos 8, Labrada 5, Adlit 4

Ikaduhang duwa:

JHON VIDEOKE (61) - Ngujo 14, Magat 13, Lungay 7, Villamor 6, Fausto 6, Dignos 5, Fuentes 4, Cantila 2, Lorena 2, Simbajon 2

YAN C RICO (58) - Sepe 12, Cadungog 12, Ochea 12, Medina 8, Celiz 5, Lapoja 5, Cosep 2, Hiyas 2. – BANAT NEWS