CEBU, Philippines - Gimakmak sa PTT Engineering ni coach Edsel Vallena ang Team Bicolandia, 80-64 aron pag-abante sa semifinals sa Filipino Friendship Basketball League (FFBL) didto sa Queensway Secondary School Gymnasium sa Singapore.
Upat ka magduduwa sa PTT Engineering ang mi-iskor og double figures nga gipangulohan ni Edsel Labajo, kinsa miposa og 16 puntos. Si Robert Rapirap mihipos og 12 puntos, samtang sila si Randy Bosque ug Jovanni Baysa miabuno og 10 puntos matag usa
Ang Team Bicolandia gipangulohan ni Rex Robles, kinsa miburak og 18 puntos, gisundan nilang Eugene Eugenio ug June Calma nga mikimada og 12 puntos matag usa.
Nagtabla sa iskor ang duha ka koponan paghuman sa unang kuwarter, 18-all, apan ang PTT Engineering milusad og 26-7 nga rally aron pahamtangan ang Bicolandia og makabungog nga labaw.
Ang PTT Engineering makigsangka sa Pinoy United, kinsa maoy lider sa bracket-B alang sa lingkoranan sa finals karong Agosto 30 didto gihapon sa Queensway gym.
Puntos Matag Usa
PTT Engineering (80) - Labajo 16, R. Rapirap 12, Bosque 10, Baysa 10, Layno 7, Densing 6, Nalzaro 6, Casinillo 5, Longakit 3, Krisvosky 3, Rondidas 2, M. Rapirap 0, Lacson 0, Leyte 0
Team Bicolandia (64) - Robles 18, Eguenio 12, Calma 12, E. Saysay 7, Osea 5, Saysay 4, Pili 2, Tino 2, R. Pili 2, Bazar 0, Saysay 0, Gupana 0, Santos 0, Vengano 0. – BANAT NEWS