UC Bantams milubong sa DBTC Greywolves

CEBU, Philippines - Laing demolisyon ang gihimo sa University of Cebu (UC) Junior Webmasters dihang ilang gilubong og 50 puntos ang Don Bosco Technology Center (DBTC) Baby Greywolves, 109-59 sa 9th Cebu Schools Athletic Foundation Inc. (CESAFI) basketball event kagahapon diha sa Cebu Coliseum.

Walay bugto nga misapyaw og puntos ang Junior Webmasters ug masanta lang sa higayon nga makamugna kini’g turnovers. Gitapos sa UC ang halftime sa iskor nga 56-21.

Si Jorei Marlon Pingoy mi-iskor sa iyang 22 puntos sa first half aron pangulohan ang Junior Webmasters ni coach Reggie Licanda. Si Pingoy wala na pasudla’g balik ni Licanda sa second half aron hatagan ang uban niyang mga batos sa pagpakita sa ilang labok.

Laing lima ka players ang mikulit og double figures alang sa Junior Webmasters. Si Alvin Labolabo Jr. miamot og 13 puntos, si Ruel Padilla Jr. mitampo og 12 puntos, sila si Alfred Codilla ug Gerald Ampoon mitimbre og 11 puntos matag usa, samtang sila si Oscar Pua ug Alexander Nazareno miabuno og 10 puntos matag usa.

Ang maong kadaugan maoy nagtukmod sa Junior Webmasters ngadto sa kinatas-ang dapit sa liderato uban sa University of the Visayas (UV) Baby Lancers sa managsamang 3-0 win-loss records.

Ang giihaw nga Baby Greywolves gipangulohan ni Lourence Ruiz, kinsa miposa og 14, gisundan ni Jade Francis Haben sa iyang 13 puntos ug William Kristoffer Alburo nga adunay 12 puntos.

Puntos Matag Usa

UC (109) - Pingoy 22, Labolabo 13, Padilla 12, Ampoon 11, Codilla 11, Pua 10, Nazareno 10 Saramosing 6, Joseph 5, Aranas 4, Talisic 3, Comendador 2
DBTC (59) - L. Ruiz 14, Haben 13, Alburo 12, Esbra 10, J. Ruiz 7, Yap 5, Ebajo 2, Empenio 2, Balorio 2, Bastes 2. – BANAT NEWS