CEBU, Philippines - Dalan sa pagpanimalos ablihan karon sa M. Lhuillier Kwarta Padala-Cebu Niños sa dihang mo-host kini sa kick off leg sa 2009 Smart Liga Pilipinas Conference III diha sa New Cebu Coliseum.
Ang MP Warriors ni Manny Pacquiao ug coach Ramon Pido maoy unang moharong sa Niños sa main game nga gitakda sa alas 6:00 sa gabii human sa duwa sa Trace-Laguna Stallions ni Atty. Erwin Genuino ug coach Nomar Isla batok sa Quezon Red Oilers ni Gov. Raffy Nantes ug coach Oliver Bunyi sa alas-4 sa hapon.
Manghinaot ang Niños ni Michel J. Lhuillier ug ni coach Raul 'Yayoy' Alcoseba nga mohari pagbalik sa Liga Pilipinas human sila langkati og korona sa Misamis Oriental Meteors atol sa knockout game five niadtong Abril 20. Ang Meteors maoy nakampiyon human sa ilang 64-52 nga kadaugan atubangan sa mga dumadapig sa Niños.
Ang Niños magsandig gihapon sa ilang mga beterano nga pangulohan ni Conference I MVP Marlon Basco, Bruce Dacia, Abby Santos, Woodraw Enriquez, Stephen Padilla, Alex Cainglet, Mark Ababon, Ariel Mepana ug Rino Berame.
Sila si Ian Saladaga ug Frank Nailon mobalik sab og duwa uban sa multi-titled ball club human mapalta sa miaging conference. Ang bag-ong player sa maong koponan mao ang 6-foot-3 forward nga si Jan Malinao.
Si Pacquiao gipaabot nga motambong karong adlawa aron pagdugang og bulok sa maong kalihukan uban sa iyang Warriors. Ang Warriors pabiling lig-on tungod kay wala man mabungkag ang ilang solidong line-up nga pangulohan sa ilang 6-foot-5 center Christian Cabatu uban sa beteranong point guard nga si Jomer Rubi.
Si Cabatu makig-uban nilang Dondon Mendoza, Weng Farochillen, Jaypee Locsin, Dave Sagad ug Jasper Callo, samtang si Rubi modugang og hulga sa scoring uban nilang Bob Ilanga, Dennis Concha, Louie Medalla, Apol Coronado, Jethrone Recustodio, Dondon Tadena, Jonjon Gonzaga ug rookie Anthony Timon. – BANAT NEWS