CEBU, Philippines - Mikulit dayon og daog ang AC Sports ni Achie Baba human ilang gilubong ang Sea Oil, 95-77, samtang ang BOAL quintet naka-ipsot batok sa CSN Loaders, 69-67 sa pagbukas sa San Nicolas Basketball Association (SNBA) 2009 Fiesta Cup basketball tournament diha sa Sawang Calero Sports Complex sa barangay San Nicolas, ning dakbayan.
Hinay ang pagsugod sa AC Sports diin nabiyaan sila’g kuwarto puntos, 15-19, apan ilang gipabalitok ang Sea Oil sa second period aron angkonon ang labaw sa halftime, 46-39.
Padayong nagpauwan og puntos ang AC Sports sa third period ug ilang gilupig sa pinuntosay ang Sea Oil, 34-19 aron ilubong og maayo hangtod nga nahurot ang oras sa duwa.
Sila si Rany Cabañero ug Ulysses Tigbas maoy nangu sa AC Sports nga parehong mi-iskor og 14 puntos, samtang sila si Jojo Belano ug Rommel Flordeliz midugang og 12 puntos matag usa.
Sila si Tata Polar ug Sol Solante mao sab ang nangu sa Sea Oil nga mikulit og 12 puntos matag usa.
Dili susama sa AC Sports, sayong nanginit ang BOAL hinungdan nga miposte kini otso puntos nga bentaha sa first period, 16-8.
Sila si Philip Mananquil ug Jun Parido pareho sab mi-iskor og usa ka dosenang puntos alang sa BOAL, samtang si Benjie Sanjorjo miabuno og 11 points.
Sa laing bahin, sila si James Cuizon ug Bong Paculaba maoy nangu sa CSN nga nagkumboya og 41 puntos.
Ang maong torneyo namugna pinaagi sa paningkamot sa mga bag-ong opisyales sa SNBA ubos sa liderato sa ilang presidente nga si Archie Baba.
PUNTOS MATAG USA
Unang duwa:
AC Sports (95) - Cabañero 14, Tigbas 14, Belano 12, Flordeliz 12, Surmion 6, Dico 6, Manayon 5, Estrera 4, Piloton 4, Rodriguez 4, Macarat 2, Baba 2, Anticristo 2, Yap 2
Sea Oil (77) - Solante 12, Polar 12, R. Rentucan 11, Suico 10, Cabajar 9, Pipino 8, Arances 7, J. Rentucan 7, Granda 1
Ikaduhang duwa:
BOAL (69) - Manaquil 12, Parido 12, Sanjorjo 11, Matabalan 6, E. Alfar 6, Escare 6, de Dios 6, P. Alfar 4, Golbise 4, Christopher 2
CSN (67) - Cuizon 21, Paculaba 20, Hinaut 16, Basalo 4, Vasquez 4, Macias 2 (BANAT NEWS)