Milo Little Olympics Visayas Elimination motamod og bag-ong sistema

CEBU, Philippines - Mausab na ang paagi sa pagsumada sa medal count system aron pagtino sa mamahimong kampiyon tungod kay ang Milo Little Olympics Visayas Regional Finals, sa labing unang higayon motamod sa Palaro point system format alang sa tinuig nga kalihukan nga buksan karong Septiyembre 4 diha sa Cebu City Sports Center .

Si CCSC manager Ricky Ballesteros nagkanayon nga mao kini ang unang higayon nga ilang gamiton ang point system. Sa nangaging mga torneyo, magbasi sila sa medal count nga maoy bugtong rason ang UC mao kanunay ang maghari.

"The trend for the Milo Little Olympics will surely be changed because of the new system that we will adopt. It will be anybody’s game," matud pa ni Ballesteros.

Sa miaging tulo ka tuig, kanunay mangharos ang University of Cebu sa tinuig nga Milo Little Olympics, apan karong tuiga hayan mag-atubang na sila og malisud nga tahas tungod kay nagkadaghan man ang mga partisipante nga nagagikan sa nagkadaiyang tunghaan sa mga probinsiya ug sa Visayas region.

 Dili lang ang mga tunghaan sa Sugbu ang mosalmot ning tuiga, ang Bohol, Negros, Bacolod, Leyte, Maasin City , Tacloban ug Siliman University mikonpirmar sab sa ilang partisipasyon.

 Ang mga winners sa regional finals maoy hatagan og katungod sa Visayas region nga mobandira alang sa 1st Milo Little Olympics National Finals unya sa Oktubre 23-25 dinhi gihapon sa Sugbu.

“We will be expecting more than 1, 500 athletes in the nationals. It will be a battle of the best athletes from the National Capital Region, Visayas and the Mindanao areas,” panapos ni Ballesteros.  (BANAT NEWS)