Niadtong dekada 70, si Graham Miles mihimo'g makasaysayanong kadaugan bisan pa man sa kakulian sa iyang panan-aw. Tungod sa pangedaron, mikuwap na ang panan-aw sa iyang tuo nga mata ug ang wala na lang niyang mata ang tin-aw pa og panan-aw.
Pero ang maong kakulian wala mahimong babag sa kalamposan ni Miles sa iyang pagsalmot sa dakung torneyo sa billiard. Sumala pa sa mga nakaila kaniya, si Miles nagpalambo og usa ka method of sighting nga mihagit sa tanang pagtuo nga wala na siya'y katakus sa pagpakigtakos sa mga magdudula nga walay kakulian sa panan-aw.
Ang sekreto ni Miles mao ang paggamit sa nabatonan niyang talento. Nasayod siya nga ang taktika sa iyang kaatbang dili mosalir kun gamiton niya ang iyang talento sa pagbakyaw sa iyang tako. Gamhanan man gud ang talento kay kini gasa sa kahitas-an ngadto sa tawo.
Mao nga ang unsa man nga taktika sa magdudula nga nakuha lang niya pinaagi sa makugihong pagbansay mabuntog gayod sa talento. Ug si Miles usa sa makamatuod niini.
Mas makaayo alang sa usa ka bilyarista kun aduna siya'y daghang technique sa iyang pagdula. Pero dili niya angay kalimtan nga ang talento walay substitute. Sa makadaghang higayon namatud-an nga ang talento mas gamhanan kay sa taktika. Mas nindot hinuon kun ang talento ug taktika mabatonan sa usa ka magdudula aron lisud kaayo siyang pildihon sa iyang mga kaatbang sa dula.
Ang mga eksperto sa billiard sport naghimo na'g daghang pagtuon mahitungod sa talent versus technique ug ilang nasuta nga mas makabenepisyo ang magdudula sa iyang talento kay sa mga technique nga iyang nakat-onan diha sa mapadayonong proseso sa pagbansay-bansay. Ang talento magamit dayon human kini madiskobre sanglit anaa ra man kini mismo sa magdudula. Samtang ang technique angay pang gahinan og panahon aron mapalambo kini sa dili pa mapahimuslan sa hingpit.
Ang usa ka gifted nga magdudula nga nagbaton og talagsaong talento seguradong kintapan kun aduna usab siya'y daghang teknik sa dula. Kun anaa kaniya ang talento ug teknik, kini maghatag kaniya'g daghang kagawasan sa pagpasalir sa iyang katakus sa epektibong pagdula.
* * *
(Mga sugyot ug pakisayod? Text sa 0910-8105522). – BANAT NEWS