CEBU, Philippines - Naka-eskapo ang Alelu’s Friends gikan sa mga kamot sa All-Cousins uban ang 95-90 nga kadaugan aron maangkon ang kampiyonato sa open category sa Upper Tugbungan Fiesta Basketball Tournament didto sa Upper Tugbungan, Consolacion.
Ang Alelu’s Friends ni team owner Michael Artajo ug Mary Grace Gonzales nabiyaan og siyete puntos sa first quarter, 18-25, apan nakabangon human sa ilang 26-16 rally sa second period aron mailog ang labaw sa halftime, 43-41.
Gikan didto ang Alelu’s Friends mao na ang nidikta sa duwa hangtod sa katapusang gutlo sa duwa.
Ang managsuong Malagar nga sila si Lemuel ug Elbert nagkumboya og 44 puntos aron pangulohan ang Allelu’s Friends. Si Alelu Flores miamot og 17 puntos ug si Larry Malagar mitampo og 11 puntos.
Si Chris de la Rama maoy topscorer sa All-Cousins pinaagi sa iyang 26 puntos, gisundan ni Tagalog nga adunay 20 puntos.
Ang maong liga gipasiugdahan ni Hon. Paz 'Dadang' Baroso ug commissioner Eutiqui 'Junior' Besabella uban sa suporta sa Upper Tugbungan Barangay Council ubos sa liderato ni Brgy. Captain Antonieto Tumungha.
Puntos Matag Usa
Alelu’s Friends (95) - Le. Malagar 23, El. Malagar 23, Flores 17, La. Malagar 11, Valle 9, Lou. Malagar 6, Lon Malagar 4, Dahil 4
All-Cousins (90) - De la Rama 26, Tagalog 20, Wi. Dumaguit 18, Wo. Dumaguit 11, D. Dumaguit 4, Cesar 3, Atay 2, Cedrey 2. – BANAT NEWS