3-15-3 Triathlon madayon ugma

CEBU, Philippines - Gipahibalo ni Danao City councilor Oscar 'Boying' Rodriguez nga ang gikatakdang 3-15-3 Triathlon madayon ugma diha sa Sand Beach Resort sa maong dakbayan bisan pa og adunay daghang kalihukan sa paugnat sa kusog sa maong adlaw.

Naila nga "Pipti-pipti" triathlon, ang Sugbu Triathlon officials miusab sa ngan nga 3-15-3 sa tuyo nga motaas ang level sa competition sa mga lokal.

Ang maong lumba nga naglatid sa racer ug moutainbikes, gibahin ngadto sa lima ka kategoriya -- juniors (18 paubos), senior 20 (19-29), senior 30 (30-39), female open ug mountainbike open.

Anaa usab ang tandem classification diin ang rider mosalmot sa swim ug bike event, samtang ang iyang kaubanan mao ang modagan ug mohimo sa laing event.

Gipaabot nga mosalmot ang mga dekalibreng local triathletes, kinsa nangandam sa Ironman Philippines nga mahitabo karong Agosto 23 didto sa Camarines Sur. – BANAT NEWS