Aulga Hardware mikulit sa ilang ikaduhang daog

CEBU, Philippines - Milansang sa ilang ikaduhang daog ang Aulga Hardware-CBRDAX-SCH human banlasi og 103-93 nga kapildihan ang San Remigio Beach Club (SRBC) sa nagpadayong 2009 Guadalupe Inter-Commercial Open Slam and Jam Basketball Tournament diha sa Guadalupe Sports Complex.

Sa laing duwa, ang Team Pacman nakatagamtan na gyud og daog human gibuntog ang Megalotto sa iskor nga 93-82.

Sama sa gihapon, sila si Jerry Jaca ug Abe Galinato maoy nimaneobra sa Aulga Hardware, kinsa maoy nidominar sa duwa gikan sa pagsugod hangtod nahuman.

Si Jaca mipupo og 29 puntos, samtang si Galinato miani og 21 puntos.

Ang kanhi magduduwa sa UV nga si Benedicto maoy topscorer sa SRBC pinaagi sa iyang 28 puntos, gisundan ni Saycon nga miabuno og 18 puntos. Ang SRBC nahiagom sa ilang ikaduhang sunod-sunod nga kapildihan.

Sa laing bahin, si Mario Suarez milansang og 31 puntos alang sa Pacman. Ang pilderong Megalotto gipangulohan ni Michael Almonte nga mibugha og 28 puntos.

Puntos Matag Usa

Unang duwa:

Aulga Hardware (103) - Jaca 29, Galinato 21, Abatayo 16, Sayson 9, Rodriguez 8, D. Acebron 8, J. Acebron 4, Gabucan 3, Batarilan 3, Minoza 1, Villanueva 1

SRBC (93) - Benedicto 28, Saycon 18, Dela Pisa 11, Esperat 10, Auditor 7, Espina 6, Abad 6, MAriano 3, Alano 2, Bucao 1

Ikaduhang duwa:

Pacman (93) - Suarez 31, Fuentes 20, Roncal 18, Albarillo 7, Bong 6, Koling 3, Talias 2

Megalotto (82) - Almonte 18, Potot 17, Yncierto 17, Tranghia 13, Trajero 9, Wagwag 7. – BANAT NEWS