CEBU, Philippines - Lima ka boksidor ang ipadala sa dakbayan sa Mandaue alang sa 2009 Mayor Freddie Tinga Cup National Invitational Amateur Boxing Championships nga gikatakda karong Agosto 14-16 didto sa Don Ambrosio Gym sa Cantada Sports Center sa Bagumbayan, Taguig City.
Ang Mandaue team ni coach Peter Cuizon gilangkuban nilang Reoxyl Tabogon, Gerald Suico, Michael Romarate, Joseph Ebalang ug Mark Bernaldez.
Sila si Tabogon ug Romarate pulos mga tinun-an sa Cabancalan National High School, samtang si Suico nagtungha sa Maguikay National High School.
Sa Ilang bahin, sila si Ebalang ug Bernaldez naggikan sa Mindanao, apan karon nagbasi na dinhi sa Sugbu.
Masaligon si Cuizon nga modaog ang iyang mga batos sa ilang pagpanulong didto sa Taguig tungod sa ilang kasinatian ug nabaid sab ang ilang mga talento sa pag-apil pipila ka local tournaments ilabi na sa Summit Natural Drinking Water Fight Night Series diin sila nidaog sa ilang tagsa-tagsa ka away.
Si Tabogon moaway ubos sa 42 kgs. division, si Suico sa 45 kgs., si Romarate sa 48 kgs., si Ebalang sa 51 kgs. ug si Bernaldez sa 54 kgs.
Gawas sa Mandaue ug host Taguig, laing teams nga gilaumang mopakita’g aksiyon sa tulo ka adlaw nga binakbakay mao ang Bacolod City-based Negros Amateur Boxing Association (NABA), Misamis Oriental, Tagbilaran City ug Southern Tagalog. – BANAT NEWS