CEBU, Philippines - Mitali sa ilang ikaduhang daog ang Rollway/LLBA Selection pinaagi sa pagmakmak sa Carga, 66-54 sa 2nd Purcia Cup niadtong Domingo diha sa Sacred Heart School-Jesuits (SHS-J) gym sa Gen. Maxilom Avenue.
Gidominar sa Rollway/LLBA ang kinatibuk-ang duwa ug nakabaton kini og otso puntos nga labaw paghuman sa first period, 18-9.
Nakapanimaho sa ilang sayong kadaugan ang Rollway/LLBA dihang miabot na sa double digits ang ilang labaw, 50-39 padung na sa fourth period.
Miaksiyon og gukod ang Carga luyo sa mga paningkamot nilang Randy Rancia ug Aldwin Limotog, apan wala kini makalahutay kay nag-wild man usab si Ram Gomez, kinsa nagsige'g hakot og puntos.
Wala sab makaarte si Joseph Jayme sa Carga tungod sa hugot nga depensa nilang Boboy Ciriaco ug Rey Tampus.
Ang Rollway/LLBA nga nagbitbit og 2-1 win-loss record gipangulohan ni Gomez, kinsa misansan og 17 puntos, gisundan ni Pompi Ngujo nga miabuno og 12 puntos. Sila si Kakay Verzosa ug Ciriaco nagkumboya og 21 puntos alang sa Rollway/LLBA ni coach Billy Nadado ug asst. coach Jerry Augosto.
Gawas sa Rollway Custom Brokerages ni Rolly dela Pieza, ang LLBA gipaluyohan sab sa I3R Motor Parts ug sa John Videoke.
Ang pilderong Carga gipangulohan sab ni Francia nga mihakot og 15 puntos, samtang si Limotog midiskarga og 14 puntos.
Puntos Matag Usa
ROLLWAY/LLBA (66) - Gomez 17, Ngujo 12, Verzosa 11, Ciriaco 10, Lamoste 8, Eroles 2, Giganto 2, Amodia 2, Tampus 2
CARGA (54) - Francia 15, Limotog 14, Jayme 10, Macasero 6, B. Purcia 2, Jay Purcia 2, Jojo Purcia 2 . (BANAT NEWS)