CEBU, Philippines - Nakaipsot ang University of San Carlos (USC) Baby Warriors human masulod ang short jumper ni Anthony Gai Romaguera sa katapusang 1.10 segundo sa overtime period sa ilang kulbahinam nilang duwa batok sa University of Southern Philippines Foundation (USPF) Baby Panthers, 83-82 sa bugtong duwa sa secondary sa 9th Cebu Schools Athletic Foundation Inc. (CESAFI) basketball event diha sa Cebu Coliseum.
Daw sama nga midaog og championship game ang Baby Warriors human mahutdi og oras ang Baby Panthers.
Daku unta og purohan nga modaog ang Baby Panthers sa maong duwa, apan mikagar ang tulo ka tirada ni Rommel Diapera sa nahabiling 28 segundos sa regulasyon.
Laing duha ka Baby Panthers ang nakarekober sa bola, apan wala sab mosulod ang ilang itsa hinungdan sa overtime.
Ang Baby Panthers milusad og 6-0 run pagsugod sa overtime, 77-71, apan dali kaayo kining gipapas sa Baby Warriors ug mao na ang naghupot sa labaw human sa free throws ni Romaguera, 78-77, sa nahabiling 2:46 sa duwa.
Katapusang nilabaw ang Baby Panthers, 82-79 human sa three pointer ni Diapera, kay si Harvey Jun Palapar mipupo og basket, 81-82 sa wala pa masundi ni Romaguera alang sa ilang kadaugan.
Ang Baby Warriors, kinsa naghupot na karon og 1-1 nga baraha, gipangulohan ni Romaguera nga miposa og 18 puntos. Si Francis Dave Guardario midugang og 16 puntos, samtang si Palapar miamot og 13 puntos.
Ang Baby Panthers nga wala pa makatukob og daog sud sa duha ka duwa gipangulohan sab ni Monbert Arong pinaagi sa iyang 19 puntos, gisundan ni Daapera nga adunay 15 puntos ug Joshua Corcilles sa iyang 14 puntos.
PUNTOS MATAG USA
USC (83) - Romaguera 18, Guardario 16, Palapar 13, Malana 6, Gabuya 4, Rita 4, Co 2, Omolon 2, Kikuchi 2, Bongo 2, Juariza 2
USPF (82) - Arong 19, Diapera 15, Corcilles 14, Rosales 8, Silao 7, Tumulak 5, Gigante 3, Catipay 2, Salazar 2, Pitogo 2, Baguio 2, Lawas 2 (BANAT NEWS)