CEBU, Philippines - Gimasaker sa Yan C Rico ug John Videoke ang tagsa-tagsa nila ka kaatbang aron pag-angkon og lingkoranan sa finals sa Lapu-Lapu Basketball Association (LLBA) Friendship Cup 2009 didto sa Villas Magallanes gym sa Sta. Lucia Properties sa Basak dakbayan sa Lapu-Lapu.
Ang Yan C Rico ni team manager Tiger Inot miangkon sa katapusang luna sa finals dihang ilang gipanitan og maayo ang Smart Titans nilang Dr. Michael Ouano ug Dr. Ceniz sa iskor nga 69-39.
Si LLBA president Alan Sepe miburak og 20 puntos aron pangulohan ang Yan C Rico, kinsa nakapundo nang daan og sobra sa katunga sa halftime, 31-14.
Grabe sab nga nakapakita sa iyang abilidad si Sammy Lapoja kay bisan pa og gihigpitan kini'g guwardiya ni Iper Adlip nakahimo gihapon siya sa pag-iskor og 14 puntos. Si Ondo Cadungog milansang sab og 14 puntos alang sa Yan C Rico.
Ang pilderong Smart Titans gipangulohan ni Dandan Ramos nga mipupo og 15 puntos.
Sa laing bahin, ang John Videoke nakasulod sab sa finals human gipalagpot ang top seeded Mialnea Stones sa iskor nga 80-69.
Lima ka players ang mirehistro og double figures alang sa John Videoke ni team owner Elly Gomoz nga gipangulohan nilang Edgar Lungay ug Ruben Dignos nga miugkat og 14 matag usa.
Si team manager Lito Magat, Paulo Villamor ug Pompie Ngujo miligwat og 12 puntos matag usa alang sa John Videoke.
Ang nadisgrasya nga Mialnea Stones gipangulohan ni Bulldog Ybañez, kinsa mibugha og 19 puntos, gisundan ni LLBA commissioner Alan Yu nga adunay 12 puntos.
Ang tinaktakay nga kampiyonato himuon ugma diha gihapon sa Villas Magallanes gym.
Ang duwa sugdan sa alas-8 sa gabii human sa engkuwentro tali sa Smart Titans ug Mialnea Stones nga mag-ilog sa ikatulong dapit nga gikatakda sa alas-7 sa gabii.
Gilantaw nga hinugtanay sa bakus ang duwa sa Yan C Rico ug John Videoke nga parehong naghinam-hinam nga mosakmit sa korona.
Si Yan C Rico playing coach King Celiz maglaum gihapon sa liderato ni Sepe, kinsa nagkinahanglan sab og suporta nilang Jun Medina, Ali Cosep, Banban Ybañez, Jeffrey Hiyas, Joel Ochea ug Nixon Degulasyon.
Sa habig sa John Videoke, naghangad sab kini sa trayanggulo nilang Lungay, Dignos ug Ngujo uban nilang Christian Simbajon, Oca Fuentes, Jake Cantila, Philip Lorena ug Dodong Fausto.
Ang LLBA Friendship Cup 2009 gipaluyohan sab ni Hon. Mayor Arturo Radaza uban sa iyang kapikas nga si Brgy. Capt. Paz Radaza, Maribago Brgy. Capt. Joseph Pangatungan, Green Glass Aluminum Supply, Overseas Courier Service (OCS), COMFA General Merchandise, I3R Motor Parts ug Atty. Rico Amores.
PUNTOS MATAG USA
Unang duwa:
JOHN VIDEOKE (80) -- Lungay 14, Dignos 14, Ngujo 12, Magat 12, Villamor 12, Simbajon 6, Fuentes 4, Cantila 4 Lorena 2
MIALNEA STONES (69) - Ybañez 19, Yu 12, Tempurada 11, Soroña 9, Daluz 6, Bentazal 4, Llenes 4, Patalinghug 3, Francisco 1
Ikaduhang duwa:
YAN C RICO (69) - Sepe 20, Cadungog 14, Lapoja 14, Medina 7, Ybañez 4, Celiz 4, Cosep 4, Ochea 4, Hiyas 2
SMART TITANS (39) - Ramos 15, Impash 10, Bancale 4, Gutib 4, Labrada 2, Lamoste 2, Ouano 2 (BANAT NEWS)