GM Cacoy 90-anyos na

CEBU, Philippines - Lisod kaayong tuohan nga bisan sa iyang pangedaron nga 90-anyos, padayon gihapon naghimo og mga seminars didto sa Estados Unidos ang eskrima Supreme Grand Master nga si Ciriaco “Cacoy” Cañete.

Niadtong Sabado, Agosto 8, nagsaulog sa iyang ika-90 nga kasumaran sa iyang adlaw'ng natawhan si Cañete didto sa Los Angeles, California. Miduyog sa iyang kalipay mao ang iyang mga tinun-an sa eskrima ug pipila kanila mao si Mark Parra, ang instructor sa eskrima club nga The House of Champions, Anthony Clemans ug Fil-Am Richard Bustillo.

Nahimugso si Cañete ning kalibotan kaniadtong Agosto 8, 1919 didto sa lungsod sa San Fernando, Cebu ug nianang pagka-1932 gitukod sa mga magsoong Cañete ang nabantug na kaayong Doce Pares club diin ang iyang maguwang nga si Eulogio “Yoling” Cañete maoy nahimong lifetime president.

Si Cañete bag-o lang nakadawat sa iyang ika-14 nga Hall of Fame awards ug ang labing bag-o didto gitunol kaniya sa Tennessee. Ang maong pasidungog naggikan sa International Martial Arts Council of America (IMACA).

Sa kasamtangan, padayong nagpahigayon og mga seminars si Cañete didto sa nagkalain-laing lugar sa America ug mopauli siya dinhe sa Sugbo unya pa sa Oktobre.

Bisan pa sa iyang panuigon, wala pa gihapon maglaraw pagretiro si Cañete ug nag-anam kadako ang respeto sa iyang mga tinun-an sa eskrima sa tibuok kalibotan ug nag-anam sab kadaghan ang iyang mga disipolo.

* * *

Laing higala ug personalidad sa sports ang nagsaulog sab sa iyang natawhan kaniadtong Agosto 5 ug siya way lain kung dili si Cecilio “Lito” Gillamac, Jr. ug giila sab nga Sirlitz sa iyang mga suod nga higala.

Si Sirlitz mao ang kanhi presidente sa nabungkag na nga Cebu Basketball Federation (CBF) ug siya maoy mipuli sa founding president nga si Jack Huang, ang team owner sa Hapee Sparkling Knights dinhe sa Sugbo ug ang presidente sa Ateneo Alumni Association (AAA) Cebu Chapter.

Niadtong pagsulbong sa CBL, ang Skygo Motors ni Sirlitz ug ang Hapee ug ingon man ang General Feeds ni Albert Tan mao kanunay ang mag-abot sa finals ug didtong tungora misamot kasipa ang ngalan sa CBF. Gani , dihay usa ka higayon nga gipaduwa sa PBL ubos ni commissioner Chino Trinidad ang upat ka teams sa CBL batok sa duha ka teams sa PBL tungod sa kalig-on sa mga teams.

Miduwa ang Hapee, Skygo, General Feeds ug Casino Rubbing Alcohol batok sa Montaña Pawnshop, Shark energy drink, Blu Detergent ug John O team kinsa maoy nahimong kampiyon sa maong torneyo.

Daghang players ang na-anugnan sa pagkabungkag sa CBF apan mao man gyud kana ang kinabuhi sa players dili tanang adlaw Pasko, buot pasabot dili sa tanang panahon abunda ang ilang bulsa.

Naputol sa hinayhinay ang akong mga kontak sa ubang mga CBF team owners apan wala nako sila hikalimti isip mga suod nga higala. Usa ako sa mga saksi dihang gikasal ang anak ni Sirlitz nga si Cecilio Gillamac III o Boylits ug si Rianne ingon man usab sa kasal ni Flordeliz “Epol” Gillamac ug Taino.

Bisan wala na sila magkupot og teams, nahibalo ako nga sa ilang tagsa ka kasing-kasing, ang basketball gyud maoy duol sa ilang dughan.

* * *

SG Miscellaneous. FYA champion Rollyr Boyz and runner-up Kuya Allan held a joint victory party last week in Marigondon. Congrats to Labangon barangay councilor Ronald Dagatan for winning the overall title of the Kagawad category of the 1st Cebu City Inter-Barangay Officials Shooting Competition last August 2 at the Cebu Pistol and Rifle Association (CPRA) shooting range in barangay Pusok, Lapulapu city. The USC-BED South Campus PTCA officers extend their condolences to the death of Editha Castillo, mother of PTA president Gil Castillo. Her remains will be interred at the Manila Memorial Gardens in Liloan, Cebu. - BANAT NEWS