Kagahapon, gihimo ang ranking examinations sa Daito Ryu Aiki Jujutsu Kogyokan Dojo didto sa bag-o nilang national headquarters sa Meadowlands Subdivision sa barangay Pakigne sa lungsod sa Minglanilla.
Wala hinuon mausik ang pipila ka tuig nga pagpaabot sa mga tinun-ang mikuha sa maong pasulit tungod kay walay bisan usa kanila ang natagak ug gani usa kanila pa ang gi-promote ni Sensei John Rey Saavedra gumikan sa maayong buhat niini gawas sa dojo.
Gikatakda ang sunod nga eksaminasyon alang niadtong mga bag-ong tinun-an sa entry level nga Oku Iri Ichi ug Oku Iri Ni lakip na ang alang sa Shodan (black belt) ug Ni Dan karong umaabot nga Disyembre kun maayo ang dagan sa training sa duha na karon ka mga martial arts school sa Daito Ryu Aiki Jujutsu.
Ang Daito Ryu Aiki Jujutsu Kogyokan Dojo adunay dojo sa diha sa barangay Basak ug karon sa bag-ong Honbu niini sa Pakigne ubos sa pagdumala ni Sensei Saavedra.
* * *
Kagabii, malampusong napahigayon ang Ground & Pound V: Retribution nga gipasiugdahan ni Grand Master Benigno 'Ekin' Caniga Jr. sa Yaw-Yan Ardigma diha sa Cebu Coliseum nga gidugukan sa mga katawhan.
Si Caniga, usa ka higala nako sa kalibutan sa martial arts nga nagtudlo usab og mga dekalibreng martial artists ug usa na niini si Engie Piloton, kinsa ako usab nga higala.
Gani, niadtong misuway ko'g tuon sa ilang martial arts nga siyento porsiyentong “Filipino Kickboxing” nakaingon ko nga delikado gyud kini alang niadtong mangahas sa pagkat-on niini.
* * *
Adunay gitakda nga torneyo ang Da-SMAG pinangulohan nilang Francis Milby ug Dale Villahermosa karong umaabot nga Agosto 29 ug 30 diha sa Minglanilla gymnasium.
Usa kini ka Close-Quarter Battle (CQB) nga salmotan og 22 ka players sa matag team. Adunay mga tropeyo ug freebies ang nagpaabot alang niadtong mga partisipante.
Alang sa mga airsoft teams nga interesadong moapil mahimong mopahibalo kang Dale Villahermosa sa telepono 09228596860 ug Francis Wilby sa numero 09082250160.
Ang maong torneyo pahinungod sa kapistahan sa maong lungsod.
* * *
(Alang sa mga komentaryo ug mga pahibalo,mahimong ipadala sa akong e-mail address nga bat69ph@yahoo.com) 3 (BANAT NEWS)