Daito Ryu Aiki Jujutsu h'quarter buksan ugma

CEBU, Philippines - Pormal nga buksan ugma ang national headquarters kun Honbu sa Daito Ryu Aiki Jujutsu Rengokai-Kogyokan Dojo diha sa Meadowland subdivision sa barangay Pakigne sa lungsod sa Minglanilla, Cebu.

Ang Kogyokan Dojo nga nagtudlo og traditional martial arts sa Daito Ryu Aiki Jujutsu, gidumala ni Sensei John Rey Saavedra nga kaniadto diha pa kini nahimutang sa Fernandez building sa Belgium St. sa barangay Suba, siyudad sa Sugbu.

Ang Daito Ryu Aiki Jujutsu nga niadto pang tuig 1998 nagsugod og missionary teachings rehistrado sa Security and Exchange Commission (SEC) isip usa ka non-stock ug non-profit nga kahugpongan ug maoy bugtong Daito Ryu Aiki Jujutsu martial arts school sa Pilipinas.

Atol unya sa pagbukas sa maong martial arts school adunay ipahigayon eksaminasyon ngadto sa pipila ka mga tinun-an alang sa tinuig nga ranking.

Gawas sa unarmed techniques, ang Daito Ryu Aiki Jujutsu magtudlo sab og nagkadaiyang paggamit sa tradisyonal nga hinagiban sama sa tanto jutsu, bo jutsu, ken jutsu ug uban pa nga naglakip sa practical techniques sa pagpanalipod sa kaugalingon.

Ang Daito Ryu Aiki Jujutsu natukod 900 na ka tuig ang nilabay panahon pa sa feudal Japan nga gisugdan sa usa ka Minamoto Samurai nga si Shinra Saburo Minamoto no Yoshimitsu didto sa Omi Province (nga karon Siga Prefecture of Japan) panahon ni Emperador Seiwa.

Kini gisugdan pagtudlo gawas sa nasud sa Japan ni Sensei Sokaku Takeda, kinsa giisip nga maoy orihinal nga "Last Samurai" sa Japan.

Si Sensei Takeda, mao usab nagtudlo ni O'Sensei Morehei Ueshiba, ang founder sa Aikido nga aduna say bagang sumosunod dinhi sa Sugbu. – BANAT NEWS