Jaguars gilupig sa Wildkitten

CEBU, Philippines - Nakaipsot ang gamitoy'ng Cebu Institute of Technology (CIT) Wildkittens pinaagi sa pag-iskor og 74-72 nga kadaugan batok sa University of San Jose-Recoletos (USJ-R) Baby Jaguars sa secondary match sa nagpadayong aksiyon sa 9th Cebu Schools Athletic Foundation Inc. (CESAFI) basketball event kagabii diha sa Cebu Coliseum.

Mga Duwa Ugma (Cebu Coliseum)

4:30 pm -- CEC vs. UC (Jrs.)
6:00 pm -- USJ-R vs. SWU (Srs.)

Mikiat ang CIT Wildkittens sa unang-duha ka kuwarter ug nagtusaktusak ang ilang baskets pinaagi sa fastbreaks, apan mikolapso kini   dihang alistong mitira og lima ka sunod-sunod nga puntos nga nakapuwersa sa naulahi pagbag-o sa ilang line-up.

Ang USJ-R Baby Jaguars mihulga pinaagi sa pag-rally ubos sa liderato ni Clent Muñez, apan wala mosalir ang ilang mga paningkamot kay nahutdan kini sa oras.

Ang sipyat ni Arlister Escatron gikan sa free throw line nakadugang sa kalbaryo sa USJ-R Baby Jaguars diin niadtong higayona igo lang milabaw og kuwatro puntos sa CIT Wildkittens.

Sa sunod nga posisyon, si Vern Figues yano kaayong mipasulod sa iyang free throws sa katapusang 32.7 segundos aron mapahakan ang labaw sa CIT Wildkittens ngadto na lang sa dos puntos, 72-74.

Sukad niadto, ang duha ka teams wala makahimo og baskets sa nahabiling mga gutlo ug ang CIT Wildkittens maoy nabulahan human giangkon ang dos puntos nga kadaugan.

Si Franklyn Batiquin mao ang nangulo sa CIT Wildkittens nga mitangag og 21 puntos, gisundan ni Calvin Limalima mitimbre og 19 puntos, samtang si Mark Jayven Tallo mitimang og 14 puntos.

Sa laing bahin, ang University of Cebu (UC) Webmasters ug ang CIT Wildcats padayon pa nga nagkumbati sa pagsulat niini.

Puntos Matag Usa

CIT (74) - Batiquin 21, Limalima 19, Tallo 14, Nalos 5, Pamaong 4, Figuracion 4, Bancale 3, Tejam 2, Sanchez 2
USJ-R (72) - Autentico 19, Muñez 16, Escatron 9, Trozo 9, Figues 8, Montecilllo 5, Go 3, Senining 2. – BANAT NEWS