Cubillas, Malawi mibahad tumbahon ilang tagsa-tagsa ka kaatbang

CEBU, Philippines - Parehong nanaad sila si Ricardo 'D’Hammer' Cubillas ug Ali 'D Grappler' Malawi nga mopatumba sa tagsa-tagsa nila ka mga kaatbang sa Ground & Pound V: Retribution karong Sabado diha sa Cebu Coliseum.

 Ang fighter sa Butuan Extreme MMA nga si Cubillas makigharong ni Samchai Sir-Rencho sa Tenbudo MMA Malaysian sa ilang middleweight superfight nga gitakda sa tulo ka rounds, samtang si Malawi sa Mixed Fighting System mosuway makigsangka batok ni Voltaire 'Rough Neck' Gonzales sa Tagbilaran Red Dragon MAA.

Sa iyang bahin, si Malawi mibahad nga aduna gyu'y usa kanila ni Gonzales nga matumba ibabaw sa ring.

Sa main attraction sa kickboxing card, si Renan 'Limbas' Noblefranca sa Yaw-Yan Cebu ArDigma andam na nga makigpinaksitay batok ni Jobert 'Da Sniper' Bayling sa Wushu Sanshou sa Cagayan de Oro City.

Sa laing bahin, ang mga protagonista mag-abot karong alas-7 sa gabii alang sa usa ka press conference diha sa Yaw-Yan ArDigma Cebu Headquarters nga nahimutang sa Room 304 sa Villacampa-Capuras Building atbang sa UC-Main Campus sa dalan Sanciangko, ning siyudad.

Ang weigh-in ipahigayon karong Huwebes sa susama gihapong binyu.

Mapalit ang mga tiket sa kantidad nga P100 alang sa upper box, P300 sa lower box, P500 sa ringside ug P1,000 alang sa VIP/Sponsor.

Gipasiugdahan kini sa Yaw-Yan ArDigma Martial Arts Sports Promotions sa pagpangulo ni Yaw-Yan Cebu founder ug Vis-Min director Master Benigno 'Ekin' R. Caniga, Jr., uban sa suporta sa Tanduay, torturefight.com, RJS Metal Ads and Prints, Cebu City Sports Commission, K-1 Extreme Sportshop, Ironics Internet Cafe, Yaw-Yan ArDigma-Sacramento, USA ug Fahrenheit Design and Solution.   (BANAT NEWS)