CEBU, Philippines - Gidominaran sa Philippine-Australian Boxing Club ang Mayor Jonas Cortes Boxing at the Park dihang nanghawud ang ilang mga boksidor batok sa ilang mga kaatbang niadtong miaging gabii didto sa Mandaue Plaza Square , siyudad sa Mandaue.
Ang Philippine-Australian Boxing Club nilampos sa tulo sulod sa upat ka sangka sa pagpangulo ni Wenceslao Gakit kinsa mipahunong ni Dario Luga sa Banilad National High School sa 52 kgs category.
Sila si Kent Michael Tunacao sa 23 kgs ug Romel Tunacao sa 27 kgs category pulos niiskor og 3-0 nga kadaugan batok nila ni Archie Jakosalem ug John Kevin Aliguay sa Sanai Boxing Club.
Si Richard Rama mao ang bugtong boksidor sa PABC nga naparot dihang gipukan siya ni Vicente Seos-e Jr. sa Cabancalan Elementary School .
Gawas ni Seos-e Jr., nihakot usab og daog alang sa CES, sila si Bryan Remedio kinsa nipahunong sa second round ni Ronalden Ignacio sa Gothong National High School sa 32 kgs, samtang si Mark Emmanuel Villarino maoy nipatigbabaw batok ni Alred Sibay sa 39 kgs. division.
Ang garbo sa Pit-os nga si Dominique Castanares miiskor og 2-1 aron pildehon si Junret Caspe sa 22kgs category, samtang si Kevin Jake Castaraja midaog sa puntos batok ni Ferde San Roque sa 42 kgs ug si Sherwin Caday mipaluhod ni Ronald Diaz sa 50 kgs class. - Lemuel P. Maglinte (BANAT NEWS)