Kobe makalagot nga player

CEBU, Philippines - Usa si Kobe Bryant, ang superstar sa NBA champion Los Angeles Lakers sa upat ka mga personalidad sa NBA nga daghan ang naglagot apan ang player sa National Football League (NFL) nga si Michael Vick maoy no. 1 sa listahan sa 10 most disliked people in sports sumala pa sa Forbes Magazine.

Si Vick kinsa gimarkahan og 72 porsiyento isip daghan ang naglagot tungod sa iyang paghatag og pundo ngadto sa sindikato sa dog fighting nga gidili didto sa Estados Unidos hinungdan sa iyang pagkabilanggo.

Ang ikaduha sa listahan mao si Manny Ramirez kinsa usa ka player sa Major League Baseball (MLB) ug nakadawat og grado nga 57 porsiyento. Si Ramirez napamatud-an nga tiggamitan og steroids.

Si Alex Rodriguez nga usa sab ka players sa MLB, kanunay makit-an sa nightclub ug tiggamitan sab og steroids. Ang iyang grado 53 porsiyento.

Nahimutang sa ika-upat sa listahan mao si Terell Owens sa NFL kinsa nalambigit sa usa ka diva samtang ang ikalima mao si Byrant.

Daghan ang naglagot kang Bryant tungod sa sobra niya ka-prangka atubangan sa publiko ug may sumbong sab siya kanhi sa rape apan gibasura ang maong kaso.

Nagsunod kang Bryant mao si Allen Iverson tungod sa kadaghan sa iyang patik hinungdan nga daw gangster siyang tan-awon.

Ang ikapito mao si Isiah Thomas, ang kanhi coach sa New York Knicks nga gikasohan ug sexual harassment ug ang ikawalo mao si Stephon Marbury human siya ma-kontrobersiyal didto sa Knicks hinungdan mibalhin siya didto sa Boston Celtics.

Ang ikasiyam mao ang college football coach nga si Nick Saban ug ang ika-napulo ug kataposan sa listahan mao si John McEnroe, ang kanhi tennis champion tungod sa iyang mga binata nga mensahe sa higayon nga siya modaog. - Gabby G. Malagar (BANAT NEWS)