Tira Binta: Total ban?

Sa dili pa sugdan kining akong lindog, ipaabot una nako ang pahasubo ngadto sa tibuok katawhang Pilipinhon tungod sa kamatayon sa "Inahan sa Demokrasya" sa nasud nga si kanhi presidente Corazon Aquino kagahapon sa kaadlawon.

* * *

Unsa na gud ni. Migawas sa balita nga gustong ipa-total ban sa usa sa mga opisyal sa Hunta Probinsiyal ang airsoft. Ang hinungdan. Gumikan daw kay nahimo na kining bayolente karon ug di angayang sundon sa kabataan.

Duna man guy usa sa mga magduduwa daw nga nakapanakit sa iyang kaduwa sa pikas team ug gani misangpot gyud kini sa kinihaay, maong

siguro sa pagtimbang-timbang sa maong bokal angayang wagtangon nalang gyud ang airsoft  games.

Apan alang nako mura og sobra ra pud na. Una, ang airsoft games duna kaugalingong  rules, kini sundon gyud sa mga magduduwa, kun dunay

 molapas niini atol sa duwa duna kini sanction. Pananglitan "yellow," "red," "black" card ug uban pa.

Kun molapas pa gyud mahimo silang kuhaan og lisensya sa ilang mga airsoft guns diha sa Firearms Explosives Security Agency, Guards Supervisory Section-7 ug ning higayona “total ban” na gyud ang maong player sa bisan unsang duwa sa airsoft.

Dili ba husto na usab kaayo kadtong pagpasaka og kihang physical injuries?

Kun wagtangon ang airsoft games, dakudaku sab ang mawagtang nga buhis nga makolekta sa gobiyerno gikan sa mga lisensya, buhis gikan sa mga tindahang nagbaligya og airsoft guns ug mga accessories niini ug uban pa.

 Ug labaw sa tanan, unsaon naman intawon nang mga negosyanteng nagbaligya niini wagtangan nalang sila og kapanginabuhian.

Kun ang airsoft games giisip nga bayolente, unsaon nalang ang mixed martial arts, arnis, boxing, kickboxing ug uban pang competition nga mogamit og kusog ug taktika? i-ban sad?

Nakahibalo man siguro ang usa ka magduduwa sa iyang responsibilidad atol sa duwa, kun siya manuyo og lapas niini iyaha na nang risgo, pero mura'g di makatarunganon nga ang sala ni Pedro iduhig usab kang Juan.

* * *

Ang among photographer sa The Freeman ug Banat News nga si Reynan Villena giilogan kuno og camera sa usa sa mga staffs sa nag-organized atol sa Guv. Gwen Cup sa Mandaue niadtong milabay'ng Domingo.

Kay kuno mikuha siya og picture sa usa sa mga “na-injured” nga player. Ang nakapait kay matud pa sa among photographer gawas nga giilogan siya sa iyang camera bisan pa man sa kadako sa iyang ID nga “PRESS” gidukol pa gyud siya sa usa kanila. Gipangutana og nganong nakasulod siya. Gidukol? Unsa may sala diay nimo Dong Reynan?

* * *

Pipila ka adlaw una pa ang torneyo nipatawag og press conference ang mga organizers ug gipahibalo ang ilang kalihukan, kini usa ka pamaagi aron mapahibalo ang publiko ug aron usab dunay manan-aw ug labaw sa tanan aron dunay mokober sa ilang torneyo.

 Kinsa may nitabang pagkatap sa balita? Dili ba media? Kanang tawong magsuot og ID nga may “PRESS”? Nganong duklon man?

* * *

Lain pay ato, ato diay'ng ipahibalo nga ang Ground for Pound V “Retribution” nga mas gipanindot ni Master Ekin Cañiga sa Yaw-Yan ArDigma himuon karong Agosto 8 sa alas 7 sa gabii karong Sabado diha sa New Cebu Coliseum Complex.

Niining panahona mag-abot ang Filipino MMA artist nga si Ricardo “D Hammer” Cubillas batok sa Malaysian nga si Samchai Sip-Renchai. Aduna pay daghang kulbahinam nga sangka sa maong pasundayag.