CEBU, Philippines - Nakabawos si Petch Kokietgym ngadto sa Sugbuanong si Jason Egera human midaog pinaagi sa unanimous decision aron pagsakmit sa bakanteng WBO Asia-Pacific superflyweight title sa main event sa "Saga in Naga 3" niadtong miaging gabii diha sa Naga Sports Complex.
Nagsinukliay dayon sa ilang kinumo ang duha ka protagonista sa pagsugod sa kumbati, apan si Kokietgym maoy mipasulabi ug mipasulod og daghang mga kombinasyon nga nakapabitin ni Egera.
Si Egera misuway og hamag ngadto ni Kokietgym ug iya kining gidabodabohan, apan ang Thai boxer alistong nakahimo og counter punch nga maoy nakasanta sa iyang kapungot.
Ang duha ka hurado mi-iskor og 115-113 pabor ni Kokietgym, samtang ang ikatulong hurado mihatag og 117-111 ngadto ni Egera.
Sa supporting main event, wala usab mosalir ang abilidad ni Rey Labao human gipilde ni Jesus Muzaka Singwancha, kinsa nidaog usab pinaagi sa unanimous decision aron masakmit
ang bakanteng WBO Asia Pacific superfeatherweight
title.
Si Federico 'Magnifico' Catubay mao lang ang bugtong Pinoy nga midaog pinaagi sa split decision batok ni Pramuansak Posuwan.
Sa special attraction, si Andy Seneres mao sab ang mipatigbabaw batok ni Jhonghwa Lee sa South Korea sa ilang unom ka hugna nga kumbati. (Lemuel P. Maglinte) (BANAT NEWS)