Bag-ong format alang sa Liga 3rd Con

CEBU, Philippines - Makahigayon ang tanang koponan sa pakigduwa sa usa'g-usa sa Liga Pilipinas nga mosugod sa ilang third conference karong

Agosto19 diha sa Cebu Coliseum.

Si Noli Eala, president ug CEO sa Liga Pilipinas mipahibalo ning bag-ong format kagahapon atol sa press conference diha sa Yayoy's Grill.

Ibilin sa liga ang pocket tournaments apan ning higayona, ang top two teams human sa 10 legs makakuha og insentibo nga motikang dayon ngadto sa final round, samtang ang nangiwit nga duha ka teams awtomatik na nga matagak.

Sa seeding alang sa sunod hugna, ang teams makabaton og puntos sa matag leg. Ang sunod nga round ipaagi sa knockout phase diin ang nag-unang team moharong batok sa kinaubsan nga team.

Adunay penultimate super leg nga langkuban sa nag-unang lima ka koponan nga magsangka og single round robin format. Ang top four teams nga human sa maong round, maoy moabante sa Final Four aron pagdeterminar sa duha ka teams nga moduwa og championship series.

Sa pagka karon, 10 pa ka teams ang mipadayag sa ilang partisipasyon sa third conference. Upat niini gikan sa Luzon ug tulo ka teams gikan sa Visayas ug laing tulo gikan sa Mindanao.

Mga koponan gikan sa Luzon naglakip sa Quezon, Pampanga ug Taguig. Ang Visayan teams mao ang Cebu, Mandaue ug Bacolod. Ang defending champion Misamis Oriental maoy mangu sa Mindanao team uban sa General Santos ug Zamboanga.

(Yoyo R. Abayan)  (BANAT NEWS)