CEBU, Philippines - Gisugat og daog ang Sacred Heart School-Jesuits (SHS-J) Eaglets sa ilang pagbalik og duwa human sa pipila nga katuigan dihang ilang gipilde ang lig-ong koponan sa secondary division University of Southern Philippines Foundation (USPF) Baby Panthers, 94-86 sa pagsugod sa 9th season sa Cebu Schools Athletic Foundation Inc. (CESAFI) kagahapon diha sa Cebu Coliseum.
Ang SHS-J Eaglets, kinsa mibalik sa liga sa labing unang higayon sukad sila niduwa sa Cebu Amateur Athletic Association (CAAA) 13 na ka tuig ang nilabay naghangad sa ilang duha ka tore nga sila si Chris Porter ug Julius Cadavis nga pulos adunay gitas-on nga 6-foot-3 ug ni 6-foot-1 Jed Rama, anak ni kanhi bise gobernador Enrique Rama.
Daku kaayo'g kadaut ang nahimo ni Rama ngadto sa Baby Panthers nga yano kaayo niyang gilutsan ang mga gagmitoy'ng guwardiya. Si Rama maoy nangulo sa SHS-J Eaglets pinaagi sa pagposte og 31 puntos.
Nakakuha sab siya og suporta gikan ni Porter, kinsa miabuno og 16 puntos, apan si Jerry Jan Albert Seno maoy nagdala sa papel sa nanghinapos nga bahin sa duwa tungod sa iyang mga crucial baskets. Si Seno miabuno og 21 puntos sa maong kadaugan.
Human miposte og 12 puntos nga labaw, 71-69 sa third quarter, ang Baby Panthers misuway og ilog sa labaw pinaagi sa pagpatuman og trapping defense, apan pakyas kini kay ang SHS-J Eaglets daghang maayo modala og bola nga yano ra kaayo mibuak sa ilang depensa.Usa na niini si Adven Jess Diputado, manghod ni UV Lancers Chris Victor Diputado.
Ang gipakoratan nga Baby Panthers gipangulohan ni Jonathan Rosales, kinsa miposa og 16 puntos, lakip na ang sunod-sunod nga triples.
Laing duha ka magduduwa ang mikulit og double figures alang sa Baby Panthers.
Sa laing bahin, ang University of San Jose-Recoletos (USJ-R) Jaguars ug ang University of San Carlos (USC) Warriors padayon pa nga nagkumbati sa pagsulat niini.
PUNTOS MATAG USA
SHS-J (94) - Rama 31, Seno 21, Porter 16, Bacaltos 12, Branzuela 5, Diputado 4, Dinsay 2, Abbu 1
USPF (86) - Rosales 16, Pitogo 12, Arong 11, Diapera 11, Baguio 9, Corcilles 7, Salazar 7, Silao 4, Miñoza 3, Lambujon 2 (Gikan sa The Freeman) (BANAT NEWS)