Tropang Growee 3-on-3 National Basketball Series andam na

CEBU, Philippines - Andam na ang tanan alang sa pagpahigayon sa labing unang Tropang Growee 3-on-3 National Basketball Series libot sa unom nga dagkung siyudad lukop nasud.

Ang Baguio mao ang mo-host sa first leg karong Agosto 15-16, samtang ang Cebu mo-host sa maong event ug ingon man sa regional finals karong Septiyembre 19-20 diha sa karaang Sacred Heart School-Jesuits (SHS-J) campus sa General Maxilom Avenue, ning siyudad.

Ang lukop nasud nga torneyo nga bukas sa mga magduduwa nga nag-edad og 12 anyos ug paubos, dad-on sab ngadto sa Metro Manila karong Septiyembre 5-6, Iloilo sa Septiyembre 12-13, Cagayan de Oro City sa Septiyembre 26-27 ug sa Davao karong Oktubre 3-4.

"We are holding this as a grassroots sports development program for our kids towards a higher level of competition," matud pa ni Darren Evangelista, CEO sa organizing Evangelista Aquatics and Sports Management, Inc. atol sa press conference kagahapon diha sa Family Choice Restaurant sa Gorordo Avenue.

Mitambong sab sa press conference mao si Growee brand manager Sherwin Arceo, event director Ruel Diaz ug Cebu area coordinator Rey Cañete.

Alang sa Cebu leg, si Evangelista nagkanayon nga ang slots gilimitahan lamang ngadto sa 60 ka teams pinaagi sa first-come-first-served basis.

Ang matag koponan kinahanglan langkuban og upat ka players ug coach ug moparehistro pinaagi sa official application form nga ihatag sa organizer.

Sa registration fee nga P500, ang matag team makadawat og upat ka Growee multivitamins 120ml, tumbler, baller ug uban pang pakapin.

Ang top four teams matag eliminasyon sa matag siyudad makadawat og Growee jersey. Gawas sa trophies, ang top three placers makadawat sab og backpacks ug gift packs ug ingon man libre ang tanang pamasahi ngadto sa regional finals.

Ang tanang mga mananaog magsangka alang sa national championships karong Oktubre 4 didto sa Davao City. – BANAT NEWS