"Saga in Naga 3" karong gabii

CEBU, Philippines - Eksplosibong aksiyon ang dad-on og balik didto sa habagatang bahin sa Sugbu diin duha ka WBO regional titles ang gipaon sa "Saga in Naga 3" boxing extravaganza sugod karong alas-5 sa hapon didto sa Naga Sports Complex.

Sila si Jason Egera ug Petch Kokietgym dili lang mag-abot alang sa ilang mainitong rematch, kun dili magsangka sab kini alang sa bakanteng WBO Asia-Pacific super flyweight title sa main event sa maong boxing event nga gipasiugdahan sa SGG Sports Promotions ni international promoter Sammy G. Gello-ani ug Kokietgym sa Thailand.

Atol sa una nilang sangka,   si Egera (11-3, 5KOs) midaog batok ni Kokietgym (7-1) pinaagi sa split decision niadtong Mayo 28 diha sa Cebu Coliseum.

Karong higayuna, nisamot ka desidido si Egera nga usban si Kokietgym aron masakmit ang bakanteng WBO title. 

Sa supporting main event, si Rey Labao moaway sa bakanteng WBO Asia-Pacific junior lightweight championship batok ni Jesus Muzaka Singwancha sa Democratic Republic of Congo apan atua na karon magbase sa Thailand.

Ang beteranong si Federico Catubay nagtinguha sab nga mobawos ngadto ni  Pramaunsak Pohsuwan sa Thailand nga mipukan niya upat na ka tuig ang milabay.

Sa special attraction nga gikatakda sa unom ka hugna, si Jonghwa Lee sa South Korea makigbinukbukay ni Andy Seneres.

Ang mga tiket nagkantidad og P30 alang sa general admission, P50 sa upperbox ug P100 alang sa ringside. – BANAT NEWS