YMTEC/McMill nakalingkawas sa 2OT sa BAR

CEBU, Philippines - Miagi pa og duha ka overtime ang YMTEC/McMill una nila maangkon ang 118-111 nga kadaugan batok sa Team 8 sa Basketball Association of Ramos (BAR) Jun Pe Fiesta Cup 2009 didto sa Benjamin Solon Memorial Complex, ning siyudad.

 Ang McMill gibiyaan og 10 puntos, 60-70 sa final quarter sa regulasyon, apan hinay-hinay kining mikamang hangtod nga nakasikit. Ang perimeter jumper ni Jek Ybañez sa nahabiling 11 segundos maoy nakapatabla sa duwa, 91-all nga naghatod ngadto sa overtime.

Atol sa overtime, kanunay naglabaw ang Team 8 ubos sa pagtambayayong nilang Richie Tecson, Rene Miano ug Ronald Libre, apan si Bebot Ancot nakahigayon pag-iskor sa nahabiling singko segundos aron tablahon ang iskor, 105-all   nga miresulta ang ikaduhang overtime.

Sa ikaduhang overtime, wala na mokompiyansa ang McMill ug mipabuhagay sa ilang mga puntos hangtod nga ilang naangkon ang kadaugan.

Si Danny dela Peña maoy nangulo sa McMill sa iyang 25 puntos, gisundan ni Ancot nga adunay 20 puntos. Si Ybañez, Gangang Navarro, Kid Secuya ug Dodong Elizalde miposte sab og double figures alang sa McMill nga nagbitbit og 3-1 nga baraha.

Si Marlou Monreal mirehistro og game-high 28 puntos, si Ronald Libre midugang og 26 puntos ug si Rene Miano adunay 23 alang sa Team 8 nga nagpabiling walay daog sud sa tulo ka duwa.

Puntos Matag Usa

YMTEC/McMill (118) - Dela Peña 25, Ancot 20, Ybañez 17, Navarro 16, Secuya 13, Elizalde 12, Rama 6, Hapitan 6, Gabutero 3

Team 8 (111) - Monreal 28, Libre 26, Miano 23, Tecson 19, Yares 8, Limpangog 3, Peñas 2, Paquibot 2 . – BANAT NEWS