Team Cebu mikabkab upat ka medalya

CEBU, Philippines - Mikabkab og usa ka silver ug tulo ka bronze medals ang Team Cebu sa 2009 National Poomsae Taekwondo Championship niadtong miaging adlaw didto sa Rizal Sports Complex, Manila.

Ang garbo sa Cebu Doctor’s University (CDU) nga si Shaneen Ched Sia maoy migiya sa team Cebu dihang iyang gisakmit ang silver ug duha ka bronze medals.

Si Sia, kinsa sakop sa RP junior team nga nagbaid sa iyang abilidad ubos sa giya ni Kenn Toledo, milampos paglabni og silver sa juniors blackbelt category.

Mipahiluna usab siya sa ikatulong dapit sa synchronized team ug standard poomsae uban sa laing Sugbuanong blackbelters nga sila si Glenn Lava, Jon Andrew Cabiles, Jacqueline Choa, Marc Ruz, Iyan Anthony Lim, Claire Panaginip ug Eunice Oclarit.

Sa laing bahin, mipakita usab sa ilang abilidad sila si Claire Panaginip ug Jon Andrew Cabiles nga mitiltil og bronze sa pair event.

Si Toledo mipahiluna sa ikaupat nga dapit sa senior 2 blackbelt category nga nagpangedaron og 31 ngadto sa 40-anyos. 

Sila si Toledo, Glenn Lava ug Marc Ruz mitungtong usab sa ikaupat nga dapit sa senior team standard poomsae event.

Si Lava maoy seventh placer sa senior 1 blackbelt category (18-30 years old), samtang si Mcavyngr Alob, mitapos sa ikawalo sa grade school boys blackbelt category (11-12 years old). – BANAT NEWS