Cebu Niños, MisOr Meteors mag-ilog karon sa korona

CEBU, Philippines - Nabanhaw ang panagkaribal sa duha ka teams -- ang inaugural champion M. Lhuillier Kwarta Padala-Cebu Niños ug defending titlist MisOr Meteors sa dihang mag-ilog na sab kini sa korona sa Cebu-leg sa Smart-Liga Pilipinas pre-season games karong gabii diha sa Cebu Coliseum.

Ang Niños ug ang Meteors magsangka sa alas-7 sa gabii human sa engkuwentro sa Mandaue-Cebu Landmasters ug Trace-Laguna Stallions nga mag-ilog alang sa ikatulong dapit nga gikatakda sa alas-5 sa hapon.

Kahinumduman nga sa ilang best-of-five finals series sa miaging Liga Pilipinas Season 2, mipatigbabaw ang Meteors sa Game-5 batok sa Niños aron masakmit ang korona.

Gawas pa niini, garbo sab sa Meteors nga maoy bugtong koponan nga nakapilde sa Niños sa makaduha ka higayon sa ilang balwarte.

Ang Meteors ni Gov. Oscar Moreno ug coach Jun Noel naglaum nga makakuha og laing dungog sa ilang lisud nga hagit batok sa Niños.

Si coach Noel magsalig nila ni Neil Rañeses ug kanhi college cagers nga sila si Lyndon Gudez ug Patrick John Cabahug.

 Lakip sa gisaligan ni coach Noel mao sila si Mark Moreño, Melvin Mamacly, Philip Butel, Erian Daja, Mark Kong ug Rocky Sanchez.

Sa ilang bahin, ang Niños magsandig usab nila ni Bruce Dacia, Marlon Basco, Stephen Padilla, Woodrow Enriquez ug Abby Santos.

Si multi-titled coach Raul ‘Yayoy’ Alcoseba maghangad sab sa abilidad nilang Alex Cainglet, Jonas Mark Ababon, John Malinao, Rino Berami, Ariel Mepaña ug Franklin Nailon aron matuman ang ilang laraw nga makapanimalos sa Meteors. – BANAT NEWS