Landmasters gilumsan sa Meteors sa Liga pre-season

CEBU, Philippines - Gilubong sa reigning national champion MisOr Meteors ang Mandaue-Cebu Landmasters, 83-64 sa pagsugod sa Cebu pre-season games sa Smart-Liga Pilipinas kagabii diha sa Cebu Coliseum.

Si Melvin Mamaclay mipauwan og 14 puntos ug si John Patrick Cabahug milaglag og 12 puntos alang sa Meteors ni Govenor Oscar Moreno ug coach Jun Noel.

Ang Meteors nakabaton og 18-11 nga abante pagsugod ug gitapos nila ang third period sa iskor nga 62-46.

Ang Landmasters ni team owner Joe Soberano ug coach Jun Tan mikitkit sa labaw ngadto na lang sa otso puntos, 54-62, apan didto sa kutob ang maayo nilang labok kay ang Meteors abtik nga namupo og puntos aron inaton ang labaw, 74-55.

Ang Meteors mitatak sa ilang labing daku nga labaw ngadto sa 23 puntos, 83-60 human sa triple ni Cabahug sa nahabiling 1:35 sa duwa.

Ang pilderong Landmasters gipangulohan ni Alex Tangkay pinaagi sa iyang 13 puntos.   (BANAT NEWS)