Team Pilipinas lubong sa Iran , 85-60

CEBU, Philippines - Dili igo ang paningkamut sa Powerade-Team Pilipinas dihang gilumpag sila sa higanteng Iran , 85-60 sa katapusan nilang duwa sa 31st William Jones Cup kagahapon didto sa Hsincuahng gym, Taipei .

Bisan paman sa dakung gisi sa tuong kilay nga iyang nahiaguman dihang naigo siya ni Ranidel de Ocampo, wala gihapon magpapugong ang 7-foot-3 nga si Hamed Ehadadi dihang nipugnit siya og 19 puntos ug 12 ka rebounds aron pangulohan ang Iran kinsa nisakmit sa ilang ikapitong daog uban ang usa ka pilde.

Ang Team Pilipinas nga gipangulohan sa forward nga si Joaquim Thoss nga miposte og 13 puntos uban ni Cyrus Baguio nga mitira og 12 puntos naglisud sa ilang opensa nga maoy hinungdan sa ilang pagkalubong sa halftime, 51-23.

“Game was very easy, no problem,” matud pa sa Iranian coach nga si Vaselin Matic.

Tungod sa maong kapildehan ang Team Pilipinas nitapos sa torneyo dala ang 2-6 win-loss card, layo ra sa third place nga ilang nakab-ot sa miaging 2007 Jones Cup.

Si Team Pilipinas coach Yeang Guiao nagkanayon nga daghan sila og nakat-unan sa Jones Cup ug mao kini ang ilang gamiton aron mulambo ang ilang duwa sa umaabot nga FIBA Asian qualifier didto sa Tianjin , China.

Nanghinaut usab si Guiao nga maalim na ang injury sa iyang sinaligang gwardiya nga si Ryan Reyes kinsa wala makaduwa sa torneyo tungod sa back spasm.

Puntos matag usa :

IRAN 85 – Ehadadi 19 Bahrami 18, Afagh 14, Tadjik 11, Kamrany 9, Sahakian 6, Amini 3, Davoudi 2, Davarpanah 2, Akbari 1, Doraghi 0, Davari 0.

RP 60 – Thoss 13, Baguio 12, Santos 9, Aguilar 7, Dillinger 5, De Ocampo 4, Raymundo 3, Miller 3, Taulava 2, Norwood 2. - Lemuel P. Maglinte (BANAT NEWS)