Team 50's daog batok Team 40's

CEBU, Philippines - Midaog ang mas beteranong 50’s All Star nga gilangkuban sa mga players nga nag-edad og 50 anyos batok sa mas batan-ong team 40’s All Star sa iskor, 75-60 atol sa Power Forty All-Star Game kagahapon, usa ka exhibition game isip pagtimaan sa ika-20 nga anibersaryo sa pagkatukod sa Power Forty didto sa Inayawan Sports Complex.

Ang kapunongan sa Power Forty nga ginsakpan sa mga mahiligon sa basketball diha sa Inayawan ug sa mga silingan barangay sa Cogon Pardo ug Bulacao ug lakip na ang taga Carcar, Mandaue ug Danao, namugna kaniadtong 1989 ug si Paquito Diaz maoy napiling founding president.

Nagsugod ang Power Forty sa pito lang ka miyembro. Ang gustong magpasakop karon, mag-agi gyud una og screening aron dili kaayo magtapun-og ang ilang miyembro nga mao unya'y hinungdan nga dili na sila makaduwa og maayo sa sobra kadaghan sa team.

Human sa ilang kadaugan, ang team 50’s nakadawat og P2,000 cash prize nga gihatag ni Felix Gabiana. Ang team 40’s nakadawat sab og P500 isip consolation prize.

Sila si Michael arias ug si Loloy Dejarme maoy nangu sa 50’s All Star pinaagi sa ilang 16 ug 15 puntos matag usa kanila samtang si Wilbor Cabrera maoy nangu sa 40’s All Star pinaagi sa iyang 20 puntos ug si Alex Mercado midugang og 14 puntos.
Ang maong duwa nahimong posible sa paningkamot ni commissioner Edwin Dejacto ug sa ilang outgoing president nga si Vez Eleguin. Ang bag-ong napiling presidente sa Power Forty kagahapon mao si Tony Navares kinsa sakop sa 50’s All Star.

Puntos matag usa:

50’s All Star (75)—Arias 16, Dejarme 15, Vernaiz 13, Eleguin 10, Rama 6, Abellana 5, Labajo 4, Navares 3, Nuñez 3

40’s All Star (60)—Cabrera 20, Mercado 14, Tabar 8, Rosal 6, Abasolo 5, Fuentes 3, Cabañero 2, Ibones 2. - Gabby G. Malagar (BANAT NEWS)