Contador dili na maapsan

CEBU, Philippines - Ang Spanish cyclist nga si Alberto Contador nagpakita og katagbawan diin hayag na ang iyang kadaogan sa Tour de France ug milabaw na siya sa iyang kuban sa team nga si Lance Armstrong.

Ang 26 anyos nga si Contador miselyado na sa iyang ikaduhang kadaogan sa Tour kaniadtong Sabado dihang iyang gipakgang ang iyang mga karibal atol sa usa sa labing malisod nga pagtungas sa naghinapos na nga hugna sa lumba diin mikatkat sila sa Mont Ventoux.

Si Armstrong, ang seven-time champion, motungtong gihapon didto sa podium sa ikawalong higayon apan dili isip kampiyon kung dili modawat siya sa ikatulong pwesto nga dili maoy iyang gitinguha sa lumba.

Dihang iyang nakit-an si Contador sa yellow jersey sa Champs-Elysees, mibungat na sab og dili maayong pamahayag si Armstrong ug sulod sa mainitong lumba, si Contador misalikway sa diyotay'ng kasungian sa ilang Kazakh Astana team ug wala manumbaling sa mga pangutana kalabot sa ilang panagbangi ni Armstrong.

Ug sa nagkadu-ol na niyang kampiyonato sa Tour, si Contador nagkanayon “My conscience is very clear because in the end I have run two races, one on the bike and one at the team hotel.”

Nasayod si Contador nga malisod ang iyang tahas sa Tour dihang mipahibalo si Armstrong sa miaging tuig nga mosalmot siya pag-usab tipon sa iyang kanhi mentor nga si Johan Bruyneel sa Astana team. Si Bruyneel nga usa ka Belgian strategist, maoy nag-train kang Contador isip iyang bag-ong cycling star.

Pagsugod gyud sa Tour diin mitumaw sab dayon ang pagpanglupad sa mga ngil-ad nga pulong, si Contador nag-ihap sa iyang mga adlaw aron tutokan ang lumba dili ang pakigbangi ni Armstrong.

Si Contador mi-ingon, “Every day, I told myself: ‘One day less.' Now, it’s all settled. Everything is better and the situation is back to normal.”

Suod nga higala sila si Armstrong ug Bruyneel ug dihang gipangutana si Contador kung nagtuo ba siya nga si Armstrong maoy padag-on sa iyang team manager, siya mitubag “That’s a good question.”

Padayon pa ni Contador, “The preparations for the Tour were complicated. There were a lot of elements stacked against me, but instead of being worried, I took it all as an added motivator.” “I think I succeeded.”

Samtang daghan ang nahitabo sa pagbalik ni Armstrong, may usa sab ka butang nga nahimo si Contador ug kana mao ang iyang kapakyasan pagdepensa sa iyang titulo sa 2007 tungod sa usa ka doping scandal.

Si Armstrong naglaraw nga maoy mangu sa bag-ong Radio Shack team sunod tuig ug si Bruyneel nagduhaduha pa sa umaabot, wala pa’y tukmang laraw si Contador apan segurado nang dili siya makigkuyog kang Armstrong pag-usab.

“He wanted to win. I wanted to win. That doesn’t make for a necessarily compatible situation,” matod pa ni Contador. “He will be surely a formidable adversary next year,” padayon niyang asoy. - Gabby G. Malagar (BANAT NEWS)