CEBU, Philippines - Sukwahi sa unang pamahayag ni Kobe Bryant nga mobalik kanila si Lamar Odom, ang nahisgotang sentro sa Lakers mas gustong mopirma og kontrata didto sa Miami Heat ug mobiya na sa Los Angeles Lakers sumala pa sa mga taho nga may kasayuran ning maong kalamboan. Si Odom wala pa mohukom apan nagkadu-ol ang posibilidad nga mobalik siya sa Heat gawas lang og palabwan sa Lakers ang ilang tanyag sa kasamtangan.
“It’s close, but it’s not done,” matod pa sa taho.
Mga opisyales sa Lakers ug mga representante ni Odom naghisgot pag-usab human sa usa ka semanang standoff diin nagsugod dihang ang tag-iya sa Lakers nga si Jerry Buss, mibakwi sa upat ka tuig nga kontrata nga nagkantidad og $36 milyones dolyares nga naggarantiya og $30 milyones dolyares.
Mga suod nga higala ni Odom nagkanayon nga samtang nadungog na ang duha ka habig, si Buss mitanyag og menos sa unang proposal nga gihimo sa Lakers.
Si Odom mahimong mopirma og lima ka tuig balor og $34 milyones tali sa Heat o mopirma og upat lang ka tuig nga maghatag kaniya’g option nga mahimong free agent sulod sa tulo ka season ug mangita og mas dako pang negosasyon. Dili sab siya pabayron og state income tax sa Florida.
Si Odom mag-30 anyos na karong Nobiyembre 6, miduwa sa Heat sa 2003-04 season ug mao lang ang season sa iyang 10 ka tuig sa iyang career nga wala siya sa Los Angeles ug nagmentenar og maayong relasyon tali kang Dwyane Wade.
Ang pagbiya ni Odom dakong alkanse alang sa Lakers ug sa laing mga top contenders sa Western Conference. Nag-average siya og 11.4 puntos ug 8.2 rebounds sa miaging season ug maayo sab kaayong nakaduwa atol sa finals dihang midaog ang Lakers sa korona bisan pa’g gihasol siya sa iyang back spasms.
Ang Lakers mihulip kang Trevor Ariza ngadto kang Ron Artest karong summer apan ang gidugayan ug kadaku’g gamit ni Odom maoy naghatag og kalisdanan aron siya tugbangan sa laing karibal nga teams.
Pre-season sa Liga Pilipinas mosikad karon Mopakita na usab og aksiyon ang M.Lhuillier Kwarta Padala-Cebu Jewelers ni legendary coach Raul “Yayoy” D. Alcoseba ug team owner Michel J. Lhuillier dihang sangkaon nila ang Trace-Laguna Stallions sa main game sa Cebu pre-season sa Liga Pilipinas Conference 3 dinha sa Cebu Coliseum.
Sa dili pa sugdan ang ilang lahugay sa alas-7:00 sa gabii, magharung una ang Hapee/Hanjin-MisOr ug Cebu Landmasters sa alas-5 sa hapon.
Ang Jewelers kinsa moduwa karon uban sa ilang duha ka bag-ong players nga sila si Richard Ian Saladaga ug produkto sa Southwestern University (SWU) Cobras nga si Eriz Zanoria, naglaraw nga mopakita sa ilang abilidad aron mapukan ang Laguna.
Sama sa gihapon, sila si Bruce Dacia, Stephen Padilla, Woodrow Enriquez, Abby Santos, Danny Aying, Mark Jonas Ababon, Gerry Cavan, Marlon Basco, Ariel Mepaña ug Jojo Tangkay ang gitahasan ni Alcoseba nga mangulo sa opensa alang sa Jewelers. - Lemuel P. Maglinte (BANAT NEWS)