CEBU, Philippines - Pormal nga gilusad ang Liga Pilipinas niadtong miaging gabii didto sa Casino Español de Cebu.
Si Liga president ug CEO Noli Eala mihatag sa iyang opening remarks, samtang si BAP-SBP Vice Chairman Ricky Vargas maoy nakigpulong sa ngan ni President Manuel V. Pangilinan.
Naglaum si Vargas nga ang Liga makakaplag og mga talento alang sa nasudnong koponan sa umaabot.
Ang highlight sa maong kalihukan mao ang pagpahibalo sa 14 ka mga partisipanteng koponan -- ang Ilocos Sur Bravehearts, Baguio Victory, Pampanga Buddies, Taguig Batang Global, Laguna Stallions, Tagaytay-Cavite Heroes, Lipa Barakos, Quezon Red Oilers, Iloilo Warriors, Cebu Niños, Zamboanga Amores, Ozamiz Cotta, Pagadian Explorers ug ang Misamis Oriental Meteors.
Ang matag team representatives gipangtawag ug nakadawat og flag gikan sa Eala, nga nagpamatuod sa ilang pagkasakop ning nationwide community-based league ubos sa BAP-SBP. Gawas nga gihatagan og flag, ang maong mga representante gipapirma sab og Protocol of Constitution sa maong liga.
Ang Liga Pilipinas sugdan karong Hunyo 11 sa managlahing mga binyu. (BANAT NEWS)