Dencraft naka-ipsot

CEBU, Philippines - Gipakuratan sa Cebu Dencraft ang Versacool pinaagi sa pagposte og 73-72 nga kadaugan sa Jaycees Basketball Association (JBA) President’s Cup 2008 didto sa City Sports Club-Cebu gym.

Ang Cebu Dencraft nagbitbit na karon og 2-0 nga baraha sa maong liga nga gipaluyohan sa Metro Cebu Uptown Jaycees.

Si Jimbo Noel maoy nagtuboy sa Dencraft ngadto sa ilang kadaugan pinaagi sa pagpasulod sa duha ka free throws sa daginutong segundos sa duwa human sila mabiya-i og 12 puntos, 52-64.

Napatabla sa Dencraft ang duwa, 71-all human masulod ang duha ka free throws ni Peter Sta. Maria sa nahabiling 50 segundos sa maong duwa. Nakakubit pa si Noel og foul gikan ni Edmund Odullo sa Versacool ug ang iyang duha ka free throws maoy nagselyado sa kadaugan. 

Si Noel maoy nangu sa Dencraft sa iyang 30 puntos, samtang si Sta. Maria mi-iskor og 20 puntos ug si Joseph Jayme mitampo og 15 puntos. Si Odullo mao gihapon ang nangu sa Versacool sa iyang 20 puntos ug si Juvey Veloso mibahog og 14 puntos.

Sa laing duwa, midaog na sab ang RC Goldline-Alcatel ni Christian Paroan dihang ilang gipakamang ang Purcia Transport sa iskor nga 87-80.  

Puntos MATAG usa

Unang duwa:

Cebu Dencraft (73) -- Noel 30, P. Sta. Maria 20, Jayme 15, Yu 4, Te 2, Salgado 1, Seno 1

Versacool (72) -- Odullo 20, Veloso 14, Chua 12, Mercado 12, Sy 10, Tolentino 4

Ikaduhang duwa:

RC Goldline (87) -- So 28, Lim 26, Que 14, Manal 9, Ong 4, Go 2, F. Ong 2, Seno 2

Purcia (80) -- Balangauan 20, Hernandez 17, N. Boniel 12, J. Boniel 10, Cañares 5, Porras 4, Jumawan 4, A. Lim 4, Emboy 3, Purcia 2   (BANAT NEWS)