CEBU, Philippines - Himuon karong adlawa ang final leg sa 1st Governor Gwen Garcia Airsoft Competition Championships diha sa Prime Orion Properties, kilid sa Cebu Doctor's University (CDU) sa dakbayan sa Mandaue.
Ang Guadalupe Airsoft Team (GAT) nga nidaog og tulo sa lima ka leg moladlad karon sa ilang tanang abilidad sa tinguha nga malangkat ang overall championship.
Ang GAT maoy nanghawod sa Mandaue, San Remigio ug Argao leg nga maoy katapusang qualifying phase sa tinuig nga torneyo.
Ang duha ka adlaw nga gubat salmotan sa 16 ka koponan, kinsa nadala sa katapusang lima ka legs nga gipahigayon didto sa Mandaue, Moalboal, Balamban , San Remigio ug Argao.
Kini naglakip sa Mandaue Airsoft Group (MAG), Crack Legion, Special Airsoft Action Team (SAAT), Hammerhead, Philippine Airsoft Club of Mactan (PACMAN), Globus-Petron Alliance, Southern Cebu Airsoft Recon (SCAR), Toledo Airsoft Group (TAG), Extreme Airsoft Games Enthusiast (X-Age), Bogo team Cobra (BTC), Tango Down, Badian Airsoft Team (BAT), West Rasmuseen Team (WRT), Alex Binghay Commando (ASB Commando) ug Team Airsoft San Carlos (TASC).
Gawas sa major awards, aduna say special citations nga ihatag sama sa Best Stealth Operative, Best Sportsmanship, Best in CQB ug Best in Military Load-Out.
Ang maong torneyo gisuportahan sa QBC Sporting Supply, San Miguel Inc., ABN Dream Works, Sulpicio Lines, VECO, Habagat Outdoor Equipments, Pacific Audio Video Inc., Justins Hobby Depot, Audio One, Pyroworks, GGC Service Inc., Sheen Trade, RC Ramos Construction, Cebu RC Heli Club, JCI-Metro Cebu. – BANAT NEWS