Pagara moharong ni Butar-Butar

CEBU, Philippines – Masukod na sab ang abilidad sa ALA boxer nga si Jason Pagara dihang atubangon niya ang Indonesian knockout artist nga si Simson Butar-Butar karong Sabado didto sa Dao Public Terminal, Tagbilaran City, Bohol.

Ang 17-anyos nga si Pagara nga kasamtangang nagkupot sa WBO Asia Pacific title ug Philippine lightweight belt mag-atubang og laing lisud nga tahas batok ni Butar-Butar, kinsa mipatumba sa laing ALA boy nga si Czar Amonsot atol sa ilang away niadtong tuig 2006.

Si Pagara, lumad nga taga-Cagayan de Oro City nanganti usab nga pildihon si Butar-Butar aron mapalambo pa ang iyang rekord nga 18-1, 10KOs.

Sa supporting main event, ang Sugbuanong si Larry 'Bon Jovi' Canillas makigbinukbukay usab batok ni Roger Galicia sa Tiger City Gym, samtang ang igsuon ni Amonsot nga si Rocky makigsangka usab sa iyang kababayan nga si Samuel Galigato sa Elaba Stable sa Jagna, Bohol.

Ang maong boxing event gipasiugdahan sa Summit Natural Drinking Water ug sa ALA Boxing Promotions uban sa suporta sa kagamhanan sa dakbayan sa Tagbilaran ubos sa liderato ni Mayor Dan Neri Lim. – BANAT NEWS