Udto pa lang niadtong Hulyo 15, misubang na ang daghang bitoon ug bisan pa sa hulga sa bagyong Ising ug pagbunok sa uwan sa udtong tutok, mas midaghan ang bitoon sulod sa grand hall sa Marriott Hotel.
Nahimong usa ka Search for a Star ang pagsaulog sa 90th anniversary sa The Freeman ug gidungan ang ika-15 nga anibersaryo sa Banat News. Walay hunong nga katawa, komedya ug pasiaw ang milamoy sa dul-an tulo ka oras nga programa ug wala kini labot sa balaang misa ug sa luncheon party.
Didto nakalugar na sab ko'g imbento og mga bag-ong ngalan sa among mga kauban nga misalida atol sa mabulokong anibersaryo diin may malipayong pahibalo kanamo ang presidente sa STAR Publication nga si Sir Miguel Belmonte kay iya na sab usbawan ang among suholan. Maraming salamat Sir Mike.
Matud pa ni Sir Mike, tinuod gyud nga mas iyang gipangga ang The Freeman kay sa Philippine Star. Ang hinungdan kun tua siya sa Manila, momata siya’g alas-9 sa buntag, samtang kun adunay kalihukan sa The Freeman, mobangon siya wala pay alas-6 aron dili mabiyaan sa eroplano.
Unang mihatag og mensahe ang among general manager nga si Sir Boy Mendoza, kinsa nagserbisyo sa The Freeman lima pa lang ka tuig ug matud pa niya “napamahal ko na ang Freeman at hindi lang ako natutong mahalin ang Freeman, niyayakap ko pa.”
Nahugyaw og samot ang mga kauban nako sa buhat dihang mibutyag ang among publisher nga si Sir Juanito 'Nito' Jabat nga dihay usa ka reader nga gustong masayod sa kasaysayan sa The Freeman ug buhatan niyang sugilanon nga mag-ulohan unta og “The Rise and Fall of The Freeman.” Kalma kaayong mitubag si Sir Jabs nga sayop ang premise kay ang Freeman wala mo-fall, sige lang og rise.
Puwerteng sayopa gyud sa maong tawo kay mas mokatawa unta to si Sir Jabat kun ang iyang title “The Rice and Flour of the Freeman.”
Mas nakatawa ako pag-ingon ni Mr. Jabat nga banga pa siya sa tadyaw kun pasultion sa publiko ug nagpunay og tingsi ang LUDABI expert nga si Leo Lastimosa. “I fell honored but I am not happy” matud pa ni Sir Jabs. Unsaon ta man Sir mao man nay role sa publisher, utong na lang.
Mihatag sab og mensahe ang among chairman nga si Sir Jose 'Dodong' Gullas, kinsa nagyagyag sa tinguha paglumpag sa Freeman apan bisan pa niana, mibarog sa katalagman lakip ang Martial Law ug ang bagyong Ruping ug labaw na gyud ang pagtapon sa mga karaang sakop ngadto sa bag-ong pamantalaan.
* * *
Dili nako mahimong kalimtan ang mga bag-ong ngalan sa akong mga kauban. Just for fun lang ni ha. Trabaho lang, walang personalan.
Nag-una sa akong listahan si Joy Torrejos nga akong tawgon og Nyoy Bulate nga pagsulti nako hapit sud-ipi og kinatawa sila si Queenie Bronce ug Flor Perrolino, si Caecent Magsumbol mao si Mickaela Jackstone, si Ferliza “Aray” Contratista.Si Leslie Caminade maoy “Singing Zoom-bee”, si Fred Languido nahimo nang Fredwah Languidwah tungod sa iyang sayaw nga Spaghetti ug angayan sab siya magbinayot, si Pepe S. maoy Pepe Smith nga tambok o “rolling barrell” version ug si Renbor maoy bag-ong Iyo Karpo tungod sa iyang garay ginamit ang mga pulong nga karaan ug ang uwahi sa listahan mao si Kris Relatado a.k.a. Pwes Kulatado.
Miganoy sa akong kaunoran ang awit ni Marigold Lebumfacil nga “My Immortal” nga akong gihatagan og ratings nga five stars.
Nindot sab kaayo ang presentasyon gikan sa Philippine Star Manila diin usa sa sakop sa ilang dance troupe ang kalit lang mikawat og halok ngadto sa among front desk operator nga si Lagmar Laviste samtang nagkanta og “Careless Whisper.” Pagka-kontrobersiyal sab gyud anang kantaha uy, abi man nako’g ila lang to ni Hayden Kho ug Katrina Halili.
Imbes Careless Whisper nahimo man nga “Stolen Kiss” ang eksena. Upat ka star ang akong ihatag — usa alang kanila ni Sir Boy, Jessie Padin, Taira Sipalay ug AJ dela Torre sa ilang finale dance sa wala pa ang theme song nga “Cebu” nga gitawag sab og unity dance.