Melligen nagkabangis

CEBU, Philippines – Gitug-an ni ALA trainer Edito Villamor nga nagkahait karon ang abilidad ni Mark Jason Melligen, kinsa walay puas nga nag-ensayo alang sa iyang away batok sa Mehikanong si Michel 'El Bravo' Rosales sa undercard sa Nonito Donaire Jr.-Rafael Concepcion showdown karong Agosto 15 didto sa Las Vegas.

Matud pa ni Villamor nga daku karon ang kalamboan sa abilidad ni Melligen human sa training ug workout didto sa Mayweather Gym ubos sa iyang head trainer Tony Martin.

Naglangkob sa training routine ni Melligen matag adlaw mao ang plyometrics, push-ups alang sa conditioning sa boksidor ug skip rope, speedball ug shadow boxing aron mas mokusog ug mopaspas ang labyog sa iyang mga kumo. Gidugang usab ni Villamor nga sub-sub sa ensayo ang iyang batos tungod kay giisip nga usa ka delikado ang iyang sunod nga kontra.

Si Rosales nailhan nga usa ka knockout artist, apan giklaro ni Villamor nga wala sila mahadlok sa Mehikano tungod kay gipangandaman nila og sakto ang nagsingabot nga sangka. – BANAT NEWS