CEBU, Philippines – Wala mawad-i sa paglaum ang Sugbuanong go-kart racer nga si Tonyo Carcel ug nilahutay gyud hangtod sa katapusang lap aron paghari sa Asian Karting Open Championship niadtong miaging adlaw didto sa Carmona, Cavite.
Ang tinun-an sa Paref-Springdale nga si Carcel nahimutang sa ika-12 nga dapit sa pagsugod sa lumba, apan gipakita niini ang iyang abilidad ug iyang naapsan ang mga nag-unang kart racers aron masakmit ang korona.
Si Carcel mirehistro sa iyang personal best nga 48.3 segundos sa maong lumba.
Gawas sa Asian Karting Open, si Carcel milangkat sab sa Yamaha Cup junior title sa National Series, gisundan siya ni John Castelnar alang sa ikaduhang dapit ug Milo Rivera nga mi-okupar sa ikatulo.
Ang manghod ni Tonyo nga si Kali Carcel mitapos sa ikatulo nga dapit sa mini ROK nga gidominar ni Marino Sato. Si Christian Gaddis maoy mipahiluna sa ikaduha nga dapit. – BANAT NEWS