CEBU, Philippines - Nisakmit na usab og laing titulo ang mga Mindanao runners nga sila si Elmer Bartolo ug Mary Grace De Los Santos, niining higayuna sa 5K Open sa labing unang Saint Theresa’s College-MOVE with A.I.R run kagahapon diha sa General Maxilom Avenue, ning syudad.
Ang miyembro sa Philippine Team nga si Bartolo maoy nangharus sa 5K Men’s division human niya gitapos ang lumba sa oras nga 18 minutos ug 32.80 segundos, gisundan sa garbo sa University of Southern Philippines Foundation (USPF) nga si Joel Delposo sa iyang oras nga 18:46.92 samtang si Ian Bernido nipwesto usab sa ikatulong dapit sa oras nga 19:03.65.
Si De Los Santos kinsa maoy kampiyon sa miaging Run For Sight niadtong miaging Domingo, nipatigbabaw usab sa 5K Women’s division human siya nirehistro og oras nga 21 minutos ug 41.72 segundos alang sa first place. Si Haziel Ritavalle mipahiluna sa second place sa oras nga 25:01.48 ug si Gerlyn Rose Baylon maoy third placer sa oras nga 26:57.43.
Sa 5K Men’s Executive class, si Carlo Baguio maoy nigawas nga kampiyon uban sa mga runner-up nga sila si Joseph Canete ug Steve Jao, samtang si Milagrosa Pablo maoy reyna sa Women’s Executive class, gisundan nila ni Amale Mendezona-Jopson ug Lirio Omalon sa second ug third place.
Si ABS-CBN TV Patrol Central Visayas anchor Haide Acuña, maoy naghawud sa 3K STC Alumnae category, gisundan nila ni Donna Buganin ug Gemma Pido sa ikaduha ug ikatulong dapit. - Lemuel P. Maglinte (BANAT NEWS)