Armstrong mitugpa sa 4th place, Ivanov daog sa 14th lap sa Tour

CEBU, Philippines - Wala mabalaka ang Amerikanong cyclist nga si Lance Armstrong nga midailos siya ngadto sa ika-upat nga pwesto sa Tour de France apan mipahungaw sa iyang kalagot tungod kay ang iya kanhing kauban sa team nga si George Hincapie, gihikawan sa iyang yellow jersey sa karibal ra usab nga U.S. team.

Si Hincapie kinsa maoy bugtong rider nga nakauban ni Armstrong sa tanang pito ka kadaogan sa Tour, miabot may lima ka segundos nga biya sa ika-14 nga hugna kaniadtong Sabado diin ang Russian nga si Serguei Ivanov maoy midaog.

Hinoun, padayon ghapon nga nag-una sa Tour ang Italyanong si Rinaldo Nocentini sa ALM team kinsa nakatigum na ug 58 ka oras, 13 minutos ug 52 segundos sulod sa 14th stage.

Sikit kaayong nagsunod kaniya si Hincapie sa THR team nga adunay 58 ka oras, 13 minutos ug 57 segundos ug lima lang ka segundos ang biya ngadto kang Nocentini.

Ang lumba kaniadtong Sabado namantsahan tungod sa kamatayon sa usa ka 61 anyos nga babayeng misaksi sa Tour human siya madumboli sa mga escort nga police motorcycle samtang milabang siya sa rota diin miagi ang lumba.

Laing duha ka fans ang na-angol niadtong adlawa.

Ang Columbia rider nga si Hincapie mitapos sa 124 ka milya nga lumba gikan sa Colmar ngadto sa Besancon kuban ang walo ka riders sa grupo may 16 segundos human si Ivanov maka-una ug 5 minutos ug 36 segundos sa laing mga contenders.

Nahimutang sa labing unang pwesto sa breakaway group nga may 5:25 nga biya sa leader nga si Nocentini, si Hincapie may higayon untang mahimong leader sa yellow shirt.

Apan matod pa ni Armstrong ug sa iyang Astana team, angU.S. squad Garmin-Slipstream mipahinay sa pagsikad aron tabangan si Nocentini nga makahupot ug sikit nga labaw ngadto kang Hincapie.

Matod pa ni Armstrong sa iyang Twitter feed nga gitumong ngadto sa Garmin-Slipstream, nakigribal sa Columbia tungod sa kwarta aron mahimong American squad sa Tour ning tuiga.

“No one wanted George in yellow more than me,” matod pa ni Armstrong sa tweeter. Padayon pa niya “Until 10km (6.2 miles) to go he was solidly in yellow until GARMIN put on the gas and made sure it didn’t happen.”

Si Armstrong nagkanayon nga si Hincapie, “deserves to be in yellow tonight. He deserves more than that.”

Ang mga televison camera sa France nagpakita ni Hincapie samtang nagtan-aw sa grupo ni Nocentini nga mitabok sa finish line ug masuk-anon nga wala niya makuha ang yellow shirt.

“I don’t know why you would do that with George at this stage of his career,” matod pa sa Columbia manager nga si Bob Stapleton. “I mean that’s a victory for everybody. That’s something that would have gotten attention all over the U.S., that would have been good for the whole sport in America,” padayon pa ni Stapleton.

Alang kang Armstrong, gamay ra kaayong butanga nga ang gipakita ni Hincapie igo lang nagbutang kaniya sa ikaduhang pwesto nga iyang gikabangga uban sa iyang Astana teammate nga si Alberto Contador nga biya lang ug diotay sa standings.

Si Contador kinsa mi-ingon nga nanghinaut siyang si Hincapie maoy mag-una sa lumba, mihagsa gikan sa second ngadto na sa third place ug may sayis segundos nga biya kang Nocentini. - Gabby G. Malagar (BANAT NEWS)