CEBU, Philippines – Miduso si Cebu City Councilor Sylvan 'Jack' Jakosalem og usa ka resolusyon nga maghatag og pasidungog sa upat ka judo players sa Cebu City Judo Team tungod sa ilang maayong performance nga gipakita sa duha ka national judo championships nga naghatag og dungog sa siyudad sa Sugbu. Ang maong resolusyon mohatag og pasidungog sa Cebuano judokas nga naglakip ni Vicente 'Nonoy' Fernandez III, Joaquin Nicolo Fernandez, Alan Antigua ug Bryan Canillo.
Ang managsuong Fernandez, Vicente III ug Joaquin Nicolo modawat sa “outstanding and indomitable performance” award human sa ilang kalampusan sa gipahigayon nga 2009 National Junior Judo Championship didto sa SM Marikina.
Si Vicente III maoy misakmit sa gold medal sa 66 kilograms category, samtang ang iyang manghod nga si Joaquin Nicolo milabni og bronze medal sa 55 kilograms category.
Sa ilang bahin, sila si Antigua ug Canillo, kinsa pulos tinun-an sa University of Cebu (UC) sa kursong Criminology modawat usab og pasidungog dihang nakahatag sab sila og garbo sa Sugbu pinaagi sa pagsakmit og bronze medals sa 2009 Philippine National Judo Championship didto sa Manila.
Ang upat ka judokas gibansay ni Atty. Vicente E. Fernandez II, ang presidente sa Central Visayas Judo Association ug bise presidente sa Visayas sa Philippine Judo Federation.
– BANAT NEWS