1st STAA MOVE with A.I.R. run mosikad na karon

CEBU, Philippines – Mga beteranong runners ang modagan uban sa gatosan ka partisipante sa labing unang St. Theresa's College Alumnae Association-organized MOVE with A.I.R. (Awareness, Involvement and Responsibility) sayo ning buntag diha sa General Maxilom Avenue, ning siyudad.

Ang mga runners gikan sa Mindanao sama nilang Elmer Bartolo, Mary Grace de los Santos, Madelyn Carter ug Eugene Delposo maoy mangulo sa mga title contenders sa ilang tagsa-tagsa ka dibisyon.

Si ABS-CBN TV Patrol Central Visayas anchor Atty. Haide Acuña, maoy usa sa mga runners nga angay lantawon ilabi na nga usa siya ka Theresian. Hinuon, si Acuña modagan ubos sa executive class bisan pa nalandig siya sa ikaupat atol sa fifth leg sa Run For Sight Monthly Series tulo ka semana na ang nilabay.

Gawas sa 5K, adunay lumba sa 3K class alang sa STC alumnae, estudyante ug mga bata.

Ang 3K kiddies fun run adunay upat ka age brackets -- 12 years old and below, 5-7, 8-10 ug 11-12.

Aduna say 300 meter run libot sa STC campus alang sa mga batang tinun-an nga nag-edad og siyete anyos ug paubos.

Ganting salapi, tropeyo ug medalya ang madawat sa mananaog sa maong lumba nga magsilbeng opening salvo alang sa STC homecoming week.

Ang beneficiaries sa fund-raising event naglakip sa Cebu City Medical Center Hospital Medical Indigency Project, College Scholarship and Student Assistantship Program, Livelihood in Dressmaking, Website and the Electronic Chronicler Project, Happy Child Literacy Project ug Panginabuhi. – BANAT NEWS