Lanete, NCAA PC Player of the Week

MANILA, Philippines - Hindi nakakapagtakang kilalanin ng NCAA Press Corps ACCEL-FilOil Player ang San Beda guard na si Garvo Lanete matapos sumigwada ng 14 points average, 4 rebounds, 3 assists at 1.5 steals sa loob ng 27.5 minutong nilalagi nito kada laro para panatilihin ang tuktok na posisyon ng koponan.

 Pinatunayan ang dugong Lanete na nananalaytay, pinangunahan ng nakababatang kapatid ni Chico ng Barangay Ginebra ang Lions sa pagsakmal sa St. Benilde Blazers, 86-66 noong Lunes na agad pang sinundan ng paglampaso sa Perpetual Help Atlas sa pamamagitan ng 98-65 iskor upang isulong ang 3-1 baraha at pumangalawa sa Jose Rizal Bombers at San Sebastian Stags.

 Dahil sa pinamalas na husay, naging impresibo sa pa-ningin ng kanyang head coach ang performance na pinakita ni Lanete.

“Garvo is very consistent. He always makes good decisions on the court, he makes the big shots and passes the ball well,” ani nito.

 Lumutang rin ang mga pangalan nina San Beda guard JR Tecson, Jose Rizal’s John Wilson at Letran’s Rey Guevarra sa lingguhang parangal na suportado ng ACCEL at FILOIL.

Subalit sa kagila-gilalas na laro, lalong higit sa huling dalawang krusyal na laban, namayani ang kapangyarihan ng pinakabatang Lanete. (Sarie Nerine Francisco)